Ի՞նչ հետևանքներ են ունենալու կորոնավիրուսը և նրա տարածումը կանխելու նպատակով ձեռնարկվող միջոցառումները գյուղատնտեսության ոլորտում։
«Ագրարագյուղացիական միավորում» ՀԿ նախագահ Հրաչ Բերբերյանը «Առաջին լրատվական»-ի հետ զրույցում նշեց, որ աշխատանքները սկսվել են, գյուղացին դաշտում է, և եթե ցրտահարություն չլինի, ապա կունենանք ծիրանի կայուն բերք։
«Կորոնավիրուսը որևէ խնդիր չի առաջացնում, որևէ աժիոտաժ չի առաջացնում։ Այսօր մեզ համար առաջնայինը գյուղմթերք արտադրելն է, ինչով էլ զբաղվում ենք։ Մենք վարում-ցանում ենք, գյուղացին իր գործով է զբաղված»- ասաց Հրաչ Բերբերյանը։
Դիտարկմանը, թե, օրինակ, Էջմիածնում չկա՞ն մտահոգություններ, մարդիկ չե՞ն խուսափում շփումներից, Հրաչ Բերբերյանն արձագանքեց․«Հենց երեկ եղել եմ Էջմիածնում, սածիլացու էի գնում, այգիների դիմացը ծաղկած էր, մարդիկ սպասում էին, որ անձրևները վերջանան, իրենք իրենց աշխատանքն անեն։ Ցանքատարածությունները նվազել են, որովհետև գյուղացին սերմացու չստացավ, պարարտանյութ չստացավ։ Կառավարությունը զբաղված է կորոնավիրուսով։ Աշնանը պետք է մտածեին գարնանացանի մասին»։
Հրաչ Բերբերյանը կարծում է, որ այսօր կառավարությունում չկա գյուղատնտեսության մասնագետ։
«Տնտեսական մրցակցության պաշտպանության հանձնաժողովի նախագահ Գեղամ Գևորգյանը զեկուցում էր, որ կարտոֆիլ ենք ներկրում, վարչապետն էլ ողջունեց ներկրողներին։ Այսօր ողջունում են կարտոֆիլ ներկրողներին, ես մնում եմ զարմացած։ Փոխանակ խթանեն արտադրողներին, ներկրողներին են ողջունում։ Իսկ Հայաստանը երեք տարի առաջ կարտոֆիլ էր արտահանում»,- ասաց նա։
Հետաքրքրվեցինք, թե այսօր, երբ չկա գյուղատնտեսության նախարարություն, ինչպես են լուծվում ոլորտին վերաբերող խնդիրները, գյուղացին ում է դիմում հարկ եղած դեպքում։
«Այդտեղից սկսեցին էլի խնդիրները։ Ինչքան էլ դատարկագլուխ նախարար լիներ, ի պաշտոնե նա ստիպված էր գյուղատնտեսության ոլորտի հարցերն արծարծել կառավարությունում։ Հիմա էդ մարդը չունենք։ Մենք տարբեր խնդիրներով դիմել ենք, սակայն ձայն բարբառո հանապատի։ Օրինակ՝ Ախուրյանի ջրամբարում և Արփի լճում ջուր չկա, ոչ մեկը դրա համար պատասխան չի տալիս։ Գարնանը փականները բացում են, այդ ջուրը գնում է Ախուրյանի ջրամբար, այնտեղից էլ Թուրքիան տանում է։ Թող պատասխան տան դրա համար։ Ո՞վ է թույլ տվել, որ ջրամբարները բացեն, որպեսզի ջուրը գնա Ախուրյանի ջրամբար, ո՞վ է արել։ Շիրակի տարածաշրջանի գյուղերի իննսուն տոկոսն օգտվում է Արփիի ջրից։ Արփիի ջրի մակարդակը պետք է լինի 100-110 մլն խորանարդ մետր, այսօր 8 մլն խորանարդ մետր է։ Երկու հէկ կա այնտեղ, որ աշխատում են և տանում գյուղացու ջուրը»,- ասաց Հրաչ Բերբերյանը։
Լուսանկարը՝ Armeniasputnik-ի