Հայաստանի Հանրապետությունում արտակարգ դրություն է հայտարարված՝ պայմանավորված կորոնավիրուսի վարակի տարծմամբ: Փակ են հանրապետության սահմանները, չեղարկված են գործնական և տուրիստական ճամփորդությունները: 16 երկրներից արգելվել է քաղաքացիների մուտքը ՀՀ, բացի դրանից՝ օտարերկրյա ուղղություններից վերադարձող մեր բոլոր հայրենակիցները պետք է ինքնամեկուսացվեն 14 օրով:
«Կորոնավիրուսի հետևանքները ազդեցություն կթողնեն տնտեսության բոլոր ճյուղերի վրա, բայց, իհարկե, այս պահին ամենախոցելի ճյուղը տուրիզմն է»,- «Առաջին լրատվական»-ի հետ զրույցում ասաց Go travel տուրիստական ընկերության հիմնադիր տնօրեն Լիանա Սահակյանը՝ հավելելով, որ եթե պետական աջակցություն չլինի, հետագայում շատ ավելի ծանր հետևանքներ կլինեն:
«Ավիաընկերությունները քաոսի առջև են կանգնել, եթե նրանք բոլոր թռիչքները չեղարկեն, ապա ֆինանսական լուրջ ճգնաժամի առաջ կկանգնեն: Տուրիստական ոլորտը, տուր օպերատորները մի այսպիսի լուծման են հանգել. տուրիստական վաուչերի տեսքով գումարի վերադարձ կատարել. այս դեպքում ոչ թե կատարվում է գումարի վերադարձ, այլ մեկ տարվա ընթացքում հնարավորություն է տրվում ճամփորդել: Սա մեծ աջակցություն կլինի թե՛ ավիաընկերություններին, թե՛ տուրօպերատորներին, թե՛ հյուրանոցներին, իսկ զբոսաշրջիկը գումարի կորուստ չի կրում: Փոխադարձ համաձայնությամբ հնարավոր է հասնել լավ արդյունքի»,- նշեց Լ. Սահակյանը: Նա նաև հավելեց, որ Եվրոպա մեկնելու համար եթե վիզաներ են ստացել, բայց կորոնավիրուսի պատճառով չեն կարող մեկնել, պետք է վիզան ավտոմատ դառնա մուլտի վիզա և հնարավորություն տրվի մեկ տարվա ընթացքում օգտագործել. «Այս հարցը քննարկման փուլում է, հավանական է, որ այսպիսի լուծում կտրվի»:
Մանրամասն՝ տեսանյութում:
