ՀՀ գլխավոր դատախազ Արթուր Դավթյանը շարունակում է բողոքներ ներկայացնել ՀՀ վճռաբեկ դատարան՝ պահանջելով արդարացնել 2008թ․ մարտիմեկյան իրադարձություններից հետո քաղաքական հայացքների համար ազատազրկված անձանց։
Վերջին բողոքը վերաբերում է նախկին քաղբանտարկյալ, քաղաքացիական ակտիվիստ Վարդգես Գասպարիի գործով 2008թ․ նոյեմբերի 10-ին կայացված մեղադրական դատավճռին։
Վարդգես Գասպարին «Առաջին լրատվական»-ի հետ զրույցում ասաց, որ այդ գործընթացն իր համար ունի որոշ մութ կետեր։
«Երբ Վճռաբեկ դատարան մենք 2008-2009թթ․ բողոք էինք ներկայացնում, վարույթ չէին ընդունում, հիմա ի՞նչ է փոխվել, որ վարույթ է ընդունել։ Այն դատավորները, որոնք մեղադրական վճիռներ են կայացրել քաղբանտարկյալների համար, հետաքրքիր է՝ դեռ պնդո՞ւմ են, որ այդ վճիռներն արդար են կայացրել։ Արդյո՞ք Վճռաբեկ դատարանն ընդունում է, որ այն ժամանակ ինքը սխալ է վարվել՝ վարույթ չընդունելով մեր գործերը։ Չէ՞ որ այն ժամանակ նրանք ամեն գնով մեղադրական վճիռներ էին կայացնում»,- նշեց Վարդգես Գասպարին։
Մեր դիտարկմանը, որ նախկին դատավորներից, որոնք մեղադրական վճիռներ էին կայացնում քաղբանտարկյալների գործերով, ոչ բոլորն են մնացել այսօր դատական համակարգում, Վարդգես Գասպարին արձագանքեց․«Այդպես է։ Բայց պետք է պարզել, թե ինչ է փոխվել, ինչու այն ժամանակ մեղադրում էին մարդկանց, հիմա՝ արդարացնում։ Որքանո՞վ է դա արժանահավատ։ Ամբողջ պետական ապարատը, ներառյալ 17 հեռուստաընկերությունները, 2008 թվականին ընդդիմադիր գործիչներին հայտարարում էին հանցագործ, արդյո՞ք կընդունեն եւ կհայտարարեն, որ այդ մարդիկ ոչ թե հանցագործներ են եղել, այլ քաղաքական հայացքների համար են ազատազրկվել, թե՞ դա արվում է արվելու համար»։
Վարդգես Գասպարիի հայցն ընդդեմ ՀՀ-ի բավարարել էր Մարդու իրավունքների եվրոպական դատարանը՝ նրան տրամադրելով 4000 եվրո փոխհատուցում, սակայն նա հրաժարվել է վերցնել այդ գումարը՝ որպես բողոքի նշան իր նկատմամբ կատարված անարդարությունների։
«Այդ անարդարությունները, կատարվել են ինձ հետ դատարանում, կալանավայրում, երբ ինձ խոշտանգել են, իմ քաղաքացիական ակցիաների ժամանակ։ Դա վերաբերում է նաեւ այն իրավապաշտպաններին, որոնց համար իրավապաշտպանությունը փեշակ է։ Թող նրանք գնան, ստանան այդ 4000 եվրոն եւ ապահովեն իրենց բարեկեցությունը»,- ասաց Վարդգես Գասպարին։
Հիշեցնենք, որ այդ դատավճռով Վ. Գասպարին մեղավոր էր ճանաչվել Քրեական օրենսգրքի 316-րդ հոդվածի 1-ին մասով: Դատարանը հիմնավորված է համարել, որ 2008թ. մարտի 1-ին, ժամը՝ 0830-ի սահմաններում, երբ ոստիկանության 2 աշխատակիցներ Ազատության հրապարակի մոտակայքում նրան նախազգուշացրել և պահանջել են դադարեցնել անօրինական միջոցառման մասնակցելը, Գասպարին չի ենթարկվել նրանց օրինական պահանջներին և կյանքի ու առողջության համար ոչ վտանգավոր բռնություն է գործադրել վերջիններիս նկատմամբ, տվել բռնություն գործադրելու սպառնալիքներ:
Գասպարին դատապարտվել էր մեկ տարի ժամկետով ազատազրկման, որի դեմ պաշտպանության կողմի ներկայացրած բողոքը մասնակիորեն բավարարելով՝ Վերաքննիչ քրեական դատարանը 2009թ մարտի 30-ի որոշմամբ դատավճիռը պատժի մասով փոփոխել է և որպես պատիժ է նշանակել ազատազրկում տասնմեկ ամիս ժամկետով։
Վերաքննիչ քրեական դատարանի որոշման դեմ բողոք է ներկայացվել Վճռաբեկ դատարան, սակայն բողոքը վերադարձվել է՝ վարույթ ընդունելու հիմքերի բացակայության պատճառաբանությամբ։
Գլխավոր դատախազությունը հայտնում է, որ մասնավորապես, մեղադրանքը եղել է անորոշ, վերացական կերպով ուղղակի մեջբերվել է վերագրվող հանցագործությունը սահմանող նորմի դիսպոզիցիան՝ առանց նկարագրելու հանցավոր արարքների կատարման ձևն ու եղանակը: Ընդ որում՝ քրեական գործով տուժող ճանաչված անձ չկա: Այդ պայմաններում անհնար է դարձել արդար դատաքննության հիմնարար իրավունքի պահանջների կատարումը, և Վ.Գասպարիի արարքում բացակայում է հանցակազմը:
Լուսանկարը՝ panorama.am-ի
