ԱՄՆ-ի իշխանությունները կորոնավիրուսի համաճարակի հետ կապված իրավիճակի պատճառով ժամանակավորապես դադարեցնում են ստանդարտ վիզային ծառայությունների մատուցումը ամբողջ աշխարհում՝ Twitter-ում հայտարարել է Պետդեպարտամենտը:
«Ի պատասխան COVID-19 համաճարակի պատճառած գլոբալ լուրջ դժվարությունների՝ Պետդեպարտամենտը ժամանակավորապես դադարեցնում է վիզայի ծառայությունների բնականոն աշխատանքը ԱՄՆ-ի բոլոր դեսպանատներում և հյուպատոսարաններում: Դեսպանությունները և հյուպատոսությունները 2020 թվականի մարտի 20-ի դրությամբ կդադարեցնեն բոլոր նախատեսված հանդիպումները՝ ներգաղթի և ոչ ներգաղթային վիզաների տրամադրման համար»,- նշվում է հայտարարության մեջ:
Միևնույն ժամանակ, Պետդեպարտամենտը հավաստիացրել է, որ հնարավորության սահմաններում դիվանագիտական ներկայացուցչությունները կզբաղվեն մուտքի արտոնագրերի տրամադրմամբ՝ կապված Միացյալ Նահանգներ մեկնելու հրատապ անհրաժեշտության հետ:
