Տնտեսագետ, Ազգային ժողովի նախկին պատգամավոր, Միավորված աշխատանքային կուսակցության նախագահ Գուրգեն Արսենյանը, հետևելով կորոնավիրուսի տարածումից հետո աշխարհում ստեղծված իրողություններին, կարծում է, որ երկիր մոլորակի պետությունների տնտեսական համակարգերն այսօր գտնվում են շատ լուրջ վտանգի առջև։
«Այդ վտանգի ախտանշանները կերևան երկու-երեք ամսից։ Այս պահին այդ համակարգերը գտնվում են նախաճգնաժամային վիճակում, որն անպայման վերածվելու է ճգնաժամի։ Աշխարհը մտնում է խոր ճգնաժամի նոր փուլ, որից դուրս կգա մեկ-երկու տարի հետո միայն։ Բնականաբար, այդ բոլոր բարդությունները սպասվում են նաև Հայաստանի տնտեսությանը, և դա պետք է հաշվի առնեն Հայաստանի տնտեսության մասնակիցները և պատասխանատուները և սկսեն մշակել համապատասխան պլաններ»,- «Առաջին լրատվական»-ի հետ զրույցում նշեց Գուրգեն Արսենյանը։
Տնտեսագետը հիշեցնում է 2008թ․ ստեղծված համաշխարհային տնտեսական ճգնաժամը և այն ժամանակվա ՀՀ վարչապետ Տիգրան Սարգսյանի գործունեությունը։
«Երբ 2009թ․համար ինը տոկոսով ՀՆԱ-ի աճով պետբյուջեն էր հաստատել, հարյուր օր հետո 14 տոկոս տնտեսական անկում արձանագրվեց։ Սա խաբեության և վատ կառավարման պարզ օրինակ է»,- հիշեցնում է Գուրգեն Արսենյանը։
Նա կանխատեսում է, որ ամբողջ աշխարհում, այդ թվում նաև Հայաստանում, տնտեսական վիճակը վատթարանալու է։
Տնտեսագետը նկատում է, որ մինչև կորոնավիրուսի տարածումը ՌԴ-ում 1 ԱՄՆ դոլարն արժեր 62 ռուբլի։
«Երբ Հայաստանից տնտեսվարողն իր ապրանքն ուղարկում էր Մոսկվա, որպեսզի հայկական ապրանքը վաճառեն խանութներում, իրենք վաճառում էին 62 ռուբլով, մեր տնտեսվարողն այդ 62 ռուբլով մեկ դոլար էր առնում, իր շահույթը մեջն էր լինում, շարունակում էր իր գործունեությունը։ Այսօր Մոսկվայում 1 ԱՄՆ դոլարն արժե 82 ռուբլի, իսկ դու ապրանքը չես կարող թանկացնել, որովհետև այն չեն գնի խանութից։ Սա նշանակում է, որ 62 ռուբլու փոխարեն ինքը պետք է 82 ռուբլով դոլար գնի։ Այսինքն՝ այդ 82 ռուբլուն էլ մի բան էլ ինքը պետք է ավելացնի, որ կարողանա վերադարձնել իր ծախսը։ Իսկ գինը չես կարող բարձրացնել»,- ասաց Գուրգեն Արսենյանը։
Դիտարկմանը, թե Հայաստանն որքանով կարող է փոքր կորուստներով դուրս գալ ճգնաժամից՝ համեմատած այլ երկրների հետ, մեր զրուցակիցն արձագանքեց․ «Պետք չէ համեմատել, Հայաստանը կարող է համեմատվել միայն Հայաստանի հետ։ Եթե տոկոսով ենք խոսում, դա մի բան է, եթե թվերով ենք խոսում, դա բոլորովին այլ բան է։ Այս պահին Ռուսաստանի Դաշնության կորուստները՝ սկսած նավթի գնանկումից, Հայաստանի մի քսան տարվա բյուջեից ավելի շատ են։ Խոսքը միայն նավթի գնանկման մասին է։ Ինչի՞ մասին խոսենք, ինչը ինչի հետ համեմատենք։ Պետք է պատրաստ լինենք արդյունավետ աշխատանքի, արդյունավետ կառավարման, պետք է պատրաստ լինենք գոտիները ձգելու և սպասելու, որ այս մի փուլն էլ հաղթահարենք։ Աշխարհի տնտեսության պատմությունը ցույց է տալիս, որ անընդհատ, ցիկլային եղանակով տեղի են ունենում ճգնաժամեր»։