«Հայաստան» համահայկական հիմնադրամը միացել է COVID-2019 համաճարակի դեմ մղվող պայքարին, ձեռնարկել է դրամահավաք-արշավ՝ կոչ անելով աշխարհի հայությանը համախմբվել։ Դրամահավաքը շարունակվում է, իսկ մինչ այդ հիմնադրամը ձեռք է բերել վեց շնչառական ապարատ, որը մյուս շաբաթ կլինի Հայաստանում։ «Հայաստան» համահայկական հիմնադրամի տնօրեն Հայկակ Արշամյանը «Առաջին լրատվական»-ի հետ զրույցում մանրամասներ ներկայացրեց կատարված աշխատանքից։ Նա նշեց, որ «Հայաստան» համահայկական հիմնադրամը մշտապես աջակցել է առողջապահական ոլորտին։
«Նախախնամությամբ, թե պատահականությամբ անցյալ տարվա վերջին մենք «Նորք» ինֆեկցիոն հիվանդանոցին նվիրաբերեցինք արհեստական շնչառության գերհզոր սարք և ռենտգեն մոբիլ սարքավորում։ Հիմա առցանց նվիրատվությունների հարթակում հատուկ դրամահավաք-արշավ է կազմակերպված, և կոչ ենք անում Սփյուռքի մեր հայրենակիցներին մասնակցել այս կարևոր դրամահավաք-արշավին։ Միևնույն ժամանակ, բազմաթիվ անհատներ կան, որոնք կոնկրետ բժշկական պարագաներ են ցանկանում նվիրաբերել։ Մեր ցանցային տարբեր կազմակերպություններից են զանգում և հարցնում՝ ինչ կարիքներ կան։ Հիմա մենք նաև կարիքներն ենք գույքագրում և փոխանցում մեր ցանցի ընկերներին»,- ասաց Արշամյանը։
Այս պահին դրամահավաք-արշավի հաշվին կա հավաքված ավելի քան 2500 դոլար․ «Հիմնադրամը Չինաստանից արդեն ձեռք է բերել 4 արհեստական շնչառության մոբիլ ապարատներ և ևս 2-ն էլ գնվել է Չինաստանից մեր դրսի ընկերների կողմից, դրանք արդեն ճանապարհին են։ Այսինքն՝ մյուս շաբաթ կունենանք 6 շնչառական ապարատ, որը կփոխանցվի առողջապահության նախարարությանը։ Մենք բոլոր գործողությունները կոորդինացնում ենք առողջապահության նախարարության և պարետատան հետ, որպեսզի թիրախային օգնություն ցուցաբերենք։ Գումարներ են գալիս ոչ միայն online հարթակով, այլ նաև մեր հաշվեհամարներին են դրսից գումարներ փոխանցում։ Մեկ շաբաթվա ընթացքում կամփոփենք այդ գումարները և կհայտնենք հանրությանը։ Երեկ զանգ եմ ստացել Ֆրանսիայի մեր տեղական մարմնի նախագահից՝ Պետրոս Թերզյանից, ինչպես նաև Մեծ Բրիտանիայի տեղական մարմնի ղեկավար Արմինե Կարապետիից։ Օրինակ՝ արհեստական շնչառական ապարատներից 2-ը հենց Բրիտանիայի տեղական մարմնից ուղարկված գումարներով է գնվելու։ Նաև այսօր 100 հատուկ պաշտպանիչ բժշկական հանդերձանք գնեցինք և հանձնեցինք առողջապահության նախարարությանը, որը ներառում է գլխարկ, ակնոց, շոր, կոշիկ և այլն։
Եվ եթե անհրաժեշտությունը լինի, ձեռք բերենք ավելին»,- ասաց հիմնադրամի տնօրենը։ Նա հավելեց, որ շուտով նաև Ֆրանսիայից կունենանք բավական քանակի բժշկական պարագաներ, որոնք կփոխանցվեն Հայաստանի և Արցախի առողջապահության նախարարություններին, ինչի մասին հավելյալ կհաղորդվի։
Հայկակ Արշամյանը նաև շնորհակալություն հայտնեց առողջապահության նախարարությանը, բոլոր բժիշկներին ու բուժակներին անձնվեր աշխատանքի համար և վստահեցրեց, որ համազգային մոբիլիզացիայի շնորհիվ համաճարակը վստահորեն կհաղթահարվի։
Հիշեցնենք, որ նախորդ շաբաթ հիմնադրամը արդեն իսկ մեկ տոննա բժշկական պարագաներ է հասցրել Հայաստան ԱՄՆ արևմտյան ափից։
Հիմնադրամի՝ կորոնավիրուսի համաճարակի դեմ պայքարի դրամահավաքին կարող եք միանալ այս հղումով․