ՀՀ-ում մարտի 20-ի, ժամը 10:00-ի դրությամբ իրականացված կորոնավիրուսային հիվանդության (COVID-19) թեստավորման արդյունքում հաստատվել է ևս 14 դեպք: Երկրում հայտարարված է արտակարգ դրություն, և իրականացվում են դրանից բխող գործողություններ։
«Առաջին լրատվական»-ը կապ հաստատեց Տավուշի մարզպետ Հայկ Չոբանյանի հետ՝ տեղեկանալու, թե սահմանամերձ բնակավայրերում կորոնավիրուսի կանխարգելման շրջանակում ինչ աշխատանքներ են տարվում։
Մարզպետը տեղեկացրեց, որ մարզային հանձնախումբ է ստեղծվել, որտեղ բոլոր ոլորտների համար կան պատասխանատուներ։ Մշտական աշխատանք է տարվում բժշկական կազմակերպությունների հետ, բնակչության հետ, առևտրային կազմակերպությունների հետ, իրականացնում են մշտադիտարկումներ առկա իրավիճակի վերաբերյալ։
«Բնակչության շրջանում կատարվում են իրազեկման աշխատանքներ՝ տեղեկատվության փոխանցման ուղիղ ճանապարհով։ Կատարվում է արտակարգ իրավիճակից բխող տեղեկատվության տրամադրում։ Բոլոր կանոնակարգերը պահպանվում են»,- նշեց մարզպետը։
Չոբանյանի խոսքերով՝ իրենց գործողությունների արդյունքում նվազել է քաղաքացիների շարժը բնակավայրերում։ «Իհարկե, խնդիրներ դեռևս կան։ Դրանք սովորութային են։ Սա, ընտ էության, նոր մշակույթ է, կենցաղավարում է, կացութաձև է՝ սկսած միմյանց բարևելուց, վերջացրած բանկոմատի մոտ հերթ կանգնելուց։ Որքան էլ մենք զգուշություն ենք ցուցաբերում ու պահում կանոնները, պահի տակ շփոթվում ենք, դրա համար ժամանակ է պետք։ Մենք փորձում ենք ամեն ինչ անել, որ նվազեցնենք քաղաքացիների շարժը։ Գրեթե ամբողջությամբ աշխատանքային առցանց ռեժիմի ենք անցել, մարզպետարանը ևս։ Ովքեր, աշխատանքային պարտականություններից ելնելով, ստիպված են լինում գալ աշխատանքի, ամենօրյա ջերմաչափում է իրականացվում։ Կարող եմ ասել, որ 20 տոկոսը աշխատում են տեղում 80 տոկոսն առցանց։ Տեղում աշխատողները ևս փոխարինվում են։ Մարզպետարանում քաղաքացիների ընդունելությունը դադարեցված է։ Գործում է թեժ գիծ, որով մարդիկ կարող են կապ հաստատել և իրենց հուզող հարցերի պատասխանը ստանալ»,- մանրամասնեց Հայկ Չոբանյանը։
Մարզպետը նաև նշեց, որ խիստ հսկողություն է սահմանված ոչ տեղաբնակների նկատմամբ, ովքեր այլ վայրերից են եկել։
«Ամեն օր, ըստ էության, բոլոր այս գործողությունները ավելի խիստ, գործնական ու արդյունավետ են դառնում։ Մենք անընդհատ ենք աշխատում այդ գործողությունների իրականացման վրա»,- շեշտեց Տավուշի մարզպետը։
Մարզի ղեկավարի խոսքերով՝ այս հարցում մեծ դեր ունեն նաև համայնքապետները, ովքեր լիազորված են իրենց համայնքներում պահպանել բոլոր ընթացակարգերը։ Հայկ Չոբանյանի խոսքերով՝ մարզում իրավիճակը վերահսկելի է։
«Մեր կոչն է քաղաքացիներին ուշադիր լինեն իրենց ու շրջապատի հանդեպ ու ցանկացած նախանշանի դեպքում մեզ տեղեկացնեն»,- խոսքն ավարտեց Տավուշի մարզպետը։