Գերմանական «Թագես ցայտունգ» թերթի լրագրող Տիգրան Պետրոսյանը «Առաջին լրատվական»-ի հետ ուղիղ տեսակապի միջոցով խոսելով, թե ինչ հատուկ միջոցներ են կիրառվում Գերմանիայում ընդդեմ կորոնավիրուսի, ասաց. «Հատուկ միջոցը միայն սոցիալական ոչ կոնտակտի դուրս գալն է, այսինքն՝ ինքնամեկուսանալը: Դա օրենքով չէ, բայց մարդիկ, այդ թվում և ես, փորձում են քիչ շփումներ ունենալ»:
Նրա խոսքով՝ այսօր այդ վիրուսը սահմաններ չի ճանաչում. «Ուստի սխալ է, որ ես խոսեմ Բեռլինի, Գերմանիայի մասին, պիտի խոսեմ գոնե Եվրամիության մասին: Գերմանիայում վիրուսի տարածումը կանխատեսելի էր, հնարավոր չէր սահմանափակել: Բայց Գերմանիայում այդ վիրուսի լայն տարածումը կապված է նաև Իտալիայի հետ. Գերմանիայում ամեն մի դաշնային հող ինքն է որոշում իր կանոնները, այդ թվում նաև, թե երբ են լինելու դպրոցական արձակուրդները: Համբուրգում դա համընկնում էր մարտին, և համբուրգցիները օգտվել են առիթից և գնացել Իտալիա: Եվ հիմա այդ հոսքը Համբուրգ գալիս է Իտալիայից»:
Նա նշեց, որ Գերմանիայում, ի տարբերություն Հայաստանի, պարտադիր օրենքով հատուկ գործողություններ չեն ձեռնարկվում, միայն կոչերն են, որպեսզի մարդիկ խուսափեն միմյանց հետ շփումից. «Բայց կիրակի օրը երկրի կանցլեր Անգելա Մերկելը արդեն խորհրդակցություն կունենա դաշնային երկրամասի ղեկավարների հետ՝ որոշելու, թե հետագայում պարտադիր լինելո՞ւ է մեկուսանալը, թե՞ ոչ»:
Առավել մանրամասն՝ տեսանյութում: