Լրատվամիջոցների և քաղաքացիական հասարակության ներկայացուցիչները հորդորում են կառավարությանը վերանայել արտակարգ դրության հետ կապված լրատվամիջոցների գործունեության սահմանափակումներն ու դադարեցնել գրաքննությունը։ Արդեն իսկ 2 լրատվամիջոցներ՝ «Առավոտն» ու «Հրապարակը», ստիպված հեռացրել կամ վերախմբագրել են իրենց նյութերը, քանի որ զգուշացվել են՝ հակառակ դեպքում կտուգանվեն 500 հազարից մինչև 800 հազար դրամով։
Խմբագիրների համոզմամբ` երբ չկան հստակ չափանիշներ, թե որ հրապարկումները կարող են խուճապ առաջացնել, որոնք` ոչ, այդ լղոզված, ոչ հստակ ձևակերպումները կամայական մեկնաբանությունների տեղիք են տալիս, ինչն էլ այժմ տեղի է ունենում. Լրատվամիջոցների ներկայացուցիչները հանդիպել են կառավարության ներկայացուցիչների հետ՝ Արտակարգ դրության (ԱԴ) իրավիճակում իրենց աշխատանքի պայմանների քննարկման նպատակով, սակայն, ելնելով հանդիպմանը հետևած խմբագիրների հայտարարությունից, շատ բաներ անորոշ են մնում և մտահոգում են լրագրողական հանրույթին։ Որոշակիության պակասը տարբեր հետևանքների կարող է հանգեցնել: Թեմայի շուրջ «Առաջին լրատվական»-ը զրուցել է Եվրոպայի խորհրդի Քաղաքական դասընթացների երևանյան դպրոցի տնօրեն Արմեն Զաքարյանի հետ: