Կենտրոնական բանկը քննարկում է տնտեսության հետագա զարգացման տարբեր այլընտրքանքային սցենարներ և պատրաստ է արձագանքել ցանկացած իրավիճակի։ Այս մասին այսօր Կառավարության մամուլի կենտրոնում ստեղծված Հայկական միասնական տեղեկատվական կենտրոնում կազմակերպված մամուլի ասուլիսին ասաց Կենտրոնական բանկի խորհրդի անդամ Արթուր Ստեփանյանը:
Նրա խոսքով՝ իրականացվող քաղաքականության արդյունավետության համար ԿԲ-ն մշտապես հաղորդակցվում է բանկերի, վարկային կազմակերպությունների և ֆինանսական շուկայի մյուս մասնակիցների հետ, ինչպես նաև կարևորում է վերջինների սերտ գործակցությունն իրենց հաճախորդների հետ։
«Ինչպես գիտեք, մարտի 17-ին մենք նվազեցրինք վերաֆինանսավորման տեկոսադրույքն այն դեպքում, երբ մեր տարածաշրջանում շատ երկրներ բարձրացրին կամ թողեցին անփոփոխ։ Պարզ է, որ ստեղծված իրավիճակում դրամավարկային քաղաքականության դերը սահմանափակ է, քանի որ դրամավարկային քաղաքականության գործիքակազմով հնարավոր չէ ազդել առողջապահական խնդիրներով պայմանավորված իրական տնտեսական զարգացումների վրա։ Սակայն կարևոր է շարունակել պահպանել մակրոտնտեսական կայունությունը, ինչը թույլ կտա կառավարությանն ավելի արդյունավետ ապահովել թիրախավորված միջոցառումները՝ տնտեսության տարբեր սեկտորների հետ կապված»,- ասաց նա։