«Չեմ կարծում, որ ներկայումս ավելի մեծ վտանգ կա ՍԴ-ի հետ կապված, քան նախկին վտանգները, որոնք բարձրացվել են։ Ներկայիս ՍԴ-ն մոտ 20 տարի ձախողել է սահմանադրական արդարադատությունը Հայաստանում և հիմա էլ շարունակելու են այդ ընթացքը։ Բարեբախտաբար, ներկայումս ընտրական մեծ գործընթացներ չկան, և մինչև հանրաքվեն նրանք չեն կարող իրենց ամբողջ չարությունը գործի դնել։ Իսկ մանր-մունր չարաճճիությունները շուտով կավարտվեն»,- «Առաջին լրատվական»-ի հետ զրույցում ասաց Բադալյանը՝ հավելելով, որ այն գործընթացը, որը սկսվել է հեղափոխությունից հետո՝ անկասելի է։
Անդրադառնալով հարցին՝ հնարավոր է Սահմանադրական դատարանի հարցը լուծել Ազգային ժողովի միջոցով և չսպասել արտակարգ դրությունից հետո նոր հանրաքվեի նշանակմանը, Բադալյանը նշեց, որ այդ հարցը Ազգային ժողովում արդեն քննարկվել է և որոշում է կայացվել հօգուտ հանրաքվեի։ «Ես չեմ կարծում, որ որևէ հիմք, տարբերակ կա վերանայելու այդ որոշումը։ Իսկ եթե անգամ ինչ-որ տեխնիկական հնարք էլ կա դրա համար, իմ կարծիքով՝ դա անընդունելի է, որովհետև որոշում է կայացվել արդեն, որ ժողովուրդը պետք է որոշի Սահմանադրական դատարանի ապօրինի կազմի ապագան։ Որևէ գործընթաց, որը ձեռնարկվում է, պետք է լինի օրենքի շրջանակներում։ Մենք այսօր շատ ավելի կարևոր հարց ունենք լուծելու՝ դա ՀՀ ժողովրդի առողջության հարցն է, համաճարակային իրավիճակն է, մնացած բոլոր հարցերը պետք է հետաձգվեն»,- ասաց Բադալյանը։
Մեր զրուցակիցն անդրադարձավ նաև ՍԴ նախագահ Հրայր Թովմասյանի հարցազրույցին, որը արվել էր «168 ժամ» կայքի միջոցով, սակայն րոպեներ անց հեռացվել էր։ Այդ հարցազրույցում, հիշեցնենք, Հրայր Թովմասյանը խախտել էր ՍԴ նախագահի՝ քաղաքական չեզոքության պահպանման սկզբունքը և արել էր մի շարք քաղաքական հայտարարություններ, մասնավորապես, որ Հայաստանի կառավարությունն ունակ չէ և կոմպետենտ չէ պահպանելու օրինականությունը։ Բադալյանի խոսքերով, քանի դեռ Հրայր Թովմասյանը որևէ հերքում չի տարածել, ինքը համարելու է, որ այդ հայտարարության, խոսքերի հեղինակը Հրայր Թովմասյանն է։ «Դրանք քաղաքական հայտարարություններ էին, անպատասխանատու հայտարարություններ էին, և քանի դեռ ինքը չի հերքել, ես համոզված եմ լինելու, որ դրա հեղինակը ինքն է։ Այդ հայտարարությունը բոլոր չիկարելիների սահմանը հատած հայտարարություն էր, որն իրենց պաշտպանական ստրատեգիայի շրջանակներում է տեղավորվում»,- ասաց Բադալյանը։
Առավել մանրամասն՝ տեսանյութում։