«Մենք չենք դադարեցրել մեր ամենօրյա աշխատանքը: Ընթացիկ բոլոր գործողությունները կատարվում են՝ ուսումնասիրություն, վարույթներ, հաշվետվություններ: Բացի դրանից՝ ստեղծվել է հատուկ աշխատանքային խումբ, որը զբաղվում է համաճարակով պայմանավորված արտակարգ դրության այս իրավիճակում շուկայի մոնիթորինգով՝ 44 անուն ապրանքատեսակների վերաբերյալ՝ առաջին անհրաժեշտության պարենային և ոչ պարենային ապրանքների վերաբերյալ: Ստուգում ենք պաշարները և գների վերահսկողություն ենք իրականացնում»,- այս մասին «Առաջին լրատվական»-ի հետ զրույցում ասաց ՏՄՊՊՀ նախագահ Գեղամ Գևորգյանը:
«Մոնիթորինգ է իրականացվելու նաև մարզերում, յուրաքանչյուր մարզում ունենք մարզպետարանի կողմից նախարարությանը կցված աշխատանքային խումբ, ուղղորդում ենք դեպի խանութներ: Հսկողություն ենք իրականացնում, որ ապրանքը, որը գնվում է մատակարարի կամ արտադրողի կողմից, խանութում վաճառվի, ոչ թե պահեստավորվի: Դա իրավախախտում կարող է համարվել, եթե միտված լինի մրցակցության արհեստական սահմանափակմանը կամ դեֆիցիտի ստեղծմանը: Բոլոր տնտեսվարողներին տվել ենք խիստ զգուշացում, այդպիսի գործողությունը արտակարգ դրության պայմաններում կարող է համարվել իրավախախտումը ծանրացնող հանգամանք»,- նշեց ՏՄՊՊՀ նախագահը՝ հավելելով, որ արդեն երկու վարույթ է հարուցվել:
Մանրամասն՝ տեսանյութում: