Մարտի 18-ի երեկոյան Ստեփանակերտում 13 քաղաքացի փակել էին կենտրոնական փողոցներից մեկը՝ հնչեցնելով քաղաքական բնույթի պահանջներ։ Նրանք, մասնավորապես, պահանջում էին գործող նախագահի հրաժարականը, այն դեպքում, երբ Բակո Սահակյանի կառավարման ժամկետին հաշված օրեր են մնացել, և ինչպես հայտնի է, նա չի մասնակցելու ընտրություններին: Արցախի Հանրապետության ՄԻՊ-ն արձագանքել է միջադեպին: Ինչ է կատարվել Արցախում, ինչ ուժեր են կանգնած այս ամենի հետևում, որն է նրանց նպատակը։ Այս և մի շարք այլ հարցեր «Առաջին լրատվական»-ը քննարկել է «Մարդկային զարգացման միջազգային կենտրոն»-ի ղեկավար Թևան Պողոսյանի և «Քաղաքական գիտության Հայաստանի ասոցիացիայի» գործադիր տնօրեն Բենիամին Պողոսյանի հետ:
«Մի տեսակ շատ արհեստականորեն է ընկալվում, երբ բոլորը գիտեն, որ մարտի 31-ից հետո գործող նախագահ Բակո Սահակյանի միակ ֆունկցիան լինելու է իշխանության փոխանցումը, պարզապես մի քանի օր մնացած նախընտրական պայքարի տեխնոլոգիա է հիշեցնում, քան իրական պահանջի: Մի տեսակ այս րոպեին, իրավիճակի անվտանգությունից ելնելով, խնդիրները համադրելով, շատ ուշադրություն գրավելու տեխնոլոգիա էր, քան նախընտրական պայքարի»,- ասաց Թևան Պողոսյանը:
Բենիամին Պողոսյանն իր հերթին փաստեց, որ Արցախում, ինչպես ցանկացած այլ պետությունում, բնականաբար կլինեն դժգոհություններ և կան դժգոհություններ, կլինեն բողոքողներ: «Բայց նախագահական ընտրություններից 12-13 օր առաջ պահանջել գործող նախագահի հրաժարականը, երբ վերջինս չի մասնակցում ընտրություններին, չեմ կարծում՝ տրամաբանության մեջ տեղավորվող քայլ է: Մարդկանց պետք է ավելի շատ ներկայացնեն՝ ինչ է սպասվում մարտի 31-ից հետո: Գտնում եմ, որ շատ-շատերին պետք է հետաքրքրի՝ ինչ է տեղի ունենալու ընտրություններից հետո՝ սկսած նրանից՝ ով է լինելու պետության ղեկավարը, ինչ ուժեր են լինելու խորհրդարանում, բայց ամենակարևորը՝ ինչ քաղաքականություն են նրանք իրականացնելու, և ինչ է սպասվում Արցախին»:
Առավել մանրամասն՝ տեսանյութում:
