Լարսի անցակետում վրացական և ռուսական կողմից հարյուրավոր հայկական բեռներ են մնացել՝ մի քանի օր շարունակ տեղացող առատ ձյան պայմաններում: Ցրտի և սովի մատնված մեր վարորդների Հայաստան ժամանումն այս պահին անհնար է: Բանկերը չեն աշխատում, ճանապարհները փակ են: Իրավիճակն առաջացել է տարբեր պատճառներով. մի մասը՝ Ռուսաստանի հետ Վրաստանի սահմանի փակ լինելու, մյուս մասը՝ ձյան պատճառով:
«Առաջին լրատվական»-ը կապ հաստատեց աս պահին սահմանում գտնվող վարորդներից մեկի հետ: Վերջինս մեզ հետ զրույցում ասաց, որ արդեն 5-րդ օրն է, ինչ այս վիճակում են: Ոչ ոք հստակ բացատրություն չի տալիս, թե ի՞նչն է պատճառը:
«Մեզ գոնե թողնեն մտնենք սահմանի տերմինալ, մարդիկ սոված, ծարավ, չգիտեն ինչ անեն: Ոչ մի բացատրություն չեն տալիս: Օրենքի ներկայացուցիչներից միայն ճանապարհային ոստիկաններն են: Իրենց հարցնում ենք, իրենք ասում են՝ ոչինչ չգիտենք»,- ասաց վարորդը:
Նրա խոսքով՝ Վրաստանում ՀՀ դեսպանը փորձում է ինչ-որ բան անել, բայց խնդիրն այն է, որ բոլոր ճանապարհները փակ են, դեսպանը ֆիզիկապես էլ չի կարող իրենց մոտ գնալ ու տեղում ծանոթանալ վիճակին: «Դեսպանը չի կարող գալ այստեղ: Ինչ-որ բան փորձում են անել, բայց հիմա իրավիճակն այսպիսին է: Ախր, ոչ հարցնում են՝ մեռա՞ծ եք, թե՞ սաղ եք: Գոնե թողնեն մտնենք սահմանի տերմինալ, էնտեղ էլի սպասենք, տեսնենք՝ ի՞նչ է լինելու վերջը»,- դժգոհեց Լարսի անցակետում օրեր շարունակ գտնվող վարորդը:
Զրուցեցինք տեղում ու նույն իրավիճակում գտնվող մյուս վարորդների հետ ևս, ովքեր նշեցին, որ գտնվում են չափազանց անօգնական վիճակում:
«Մենք ուղղակի սարսափելի վիճակում ենք գտնվում: Դա բացատրելու չէ: 700-800 ավտո է կանգնած: Բոլորի սնունդը վերջացել է, վառելիքը վերջացել է: Չգիտենք, թե ինչ պետք է լինի սրա վերջը: Էսօր գոնե եղանակը լավ է, էլի բաց չեն թողնում: Մինչև տերմինալը 2-3 կիլոմետր է, դա էլ չեն թողնում մտնենք, գոնե հաց ա, ջուր ա, զուգարան ա, մի բան անենք: Չեն թողնում: Վարորդներին էլ տուգանում են»,- տագնապած ասում են վարորդները: Նրանց տեղեկացմամբ՝ տաքսին էլ 60 լարի է ուզում խանութ տանել-բերելու համար: Վարորդներին տուգանում են նրա համար, որ նրանք, չունենալով գումար տաքսիով խանութ գնալու և հետ գալու համար, իրենց բեռնատար մեքենաներով են գնում-գալիս:
«Էլ ոչ մի բան չունենք, չգիտենք՝ մեր վերջը ի՞նչ պետք է լինի: Մենք մեզ ստեղ զգում ենք որպես անտեր ազգ»,- ցավով նշեցին հուսահատ վարորդները: