Իտալիայում նոր տիպի կորոնավիրուսից մահացածների ավելի քան 99%-ն առողջական այլ խնդիրներ է ունեցել, բացի COVID-19-ով վարակը, հաղորդել է Bloomberg-ը՝ այդ երկրի առողջապահական ծառայություններին հղումով:
Հռոմի փորձագետները ուսումնասիրել են կորոնավիրուսից մահվան դեպքերի 18%-ի տվյալները և պարզել են, որ մահացածներից միայն երեքը (այսինքն՝ 0.8%) նախկինում որևէ պաթոլոգիա չեն ունեցել:
Նշվում է, որ մահացածների գրեթե կեսը տառապել է նվազագույնը երեք հիվանդությամբ, իսկ մեկ քառորդը՝ առողջական մեկ կամ երկու խնդիրներ է ունեցել, ընդ որում՝ մահացածների մեկ երրորդը տառապել է սրտանոթային հիվանդություններով: Բացի այդ, մահացածների ավելի քան 75%-ն արյան բարձր ճնշում է ունեցել, իսկ մոտ 35%-ը տառապել է շաքարախտով:
Bloomberg-ը նշում է, որ մահացածների միջին տարիքը 79.5 է: Մարտի 17-ի դրությամբ Իտալիայում նոր տիպի կորոնավիրուսից 50 տարեկանից ցածր 17 մարդ է մահացել:
Մարտի 18-ի դրությամբ երկրում արձանագրվել է կորոնավիրուսով վարակի ավելի քան 31.5 հազար դեպք, մահացել է ավելի քան 2.5 հազար մարդ: