Արտակարգ դրության պայմաններում մարտի 23-ին կայանալիք ԵՊՀ ռեկտորի ընտրությունները հետաձգվում են, բայց օր նշանակված չէ։ Ըստ երևույթին՝ պայմանավորված կլինի արտակարգ դրության ավարտով, և ըստ այս հայտարարության՝ կտրվի լրացուցիչ տեղեկատվություն։ Հետաձգվել է նաև համալսարանի Իջևանի մասնաճյուղի տնօրենի մրցույթը։ Այդ մասին «Առաջին լրատվական»-ի հետ զրույցում ասաց ԵՊՀ մամուլի խոսնակ Գևորգ Էմին-Տերյանը։
Քանի որ հայտարարված է արտակարգ դրություն, համալսարանն անցել է հեռավար ուսուցման, փորձում է տարբեր համակարգերով իրականացնել, որպեսզի ուսանողները հետ չմնան ծրագրից։
Հեռավար ուսուցման հետ կապված հետաքրքրվեցինք՝ արդյոք դասախոսական ամբողջ անձնակազմը տիրապետո՞ւմ է առցանց գործիքներին, որովհետև արդեն իսկ շատերը նշում են, որ չեն կարողանում հեռավար ուսուցում կազմակերպել, արդյոք այս խնդրին արդեն բախվե՞լ են համալսարանի դասախոսները։ Գևորգ Էմին-Տերյանը նշեց, որ այս պահին վիճակագրական տվյալներ չկան, թե քանիսն են կարողանում, իսկ քանիսը՝ ոչ։
«Մոտավոր գիտեմ, որ մինչ այս արտակարգ իրավիճակը մոտ 300 դասախոս էր օգտվում moodle համակարգից, բայց այս թիվը հիմա վստահաբար աճել է։ Ես մեր ուսանողներից մեկի հումորային գրառումն եմ կարդացել, որտեղ ասում է. «Մենք 24 ժամ դաս ենք անում, որովհետև մեր դասախոսը չի կարողանում video chat-ը միացնել»։ Բայց կարծում եմ՝ արտակարգ իրավիճակը կստիպի, որ ավելի արագ անցնեն հեռավար ուսուցման, և մոտ ապագայում բոլորը կկարողանան անել դա»։
Հարցին՝ հնարավո՞ր է, որ դասախոսների համար հատուկ դասընթացներ կազմակերպվեն, Գևորգ Էմին-Տերյանը նշեց՝ ոչ, քանի որ դա կլինի արտակարգ դրության խախտում. «Ունենք բաժին, որը օգնում է այն մարդկանց, ովքեր խնդիրներ ունեն սրա հետ կապված, բայց ավելի մեծ միջոցառումներ չեն կազմակերպվի»։
