Sozcu թուրքական կայքն անդրադարձել է կորոնավիրուսի դեմ պատվաստանյութ ստեղծած Moderna Inc ամերիկյան ընկերության հիմնադիր Նուբար Աֆեյանին՝ շեշտելով, որ ազգությամբ հայ Աֆեյանի ընտանիքը ապրել է Օսմանյան կայսրությունում:
«Կորոնովիրուսի դեմ ստեղծված պատվաստանյութը սկսել է փորձարկվել մարդկանց վրա: MRNA-1273 պատվաստանյութը ստեղծած Moderna Inc. ամերիկյան ընկերության հիմնադիրներից Նուբար Աֆեյանը Թուրքիայից սերող ընտանիքի թոռ է»,- գրել է կայքը՝ հրապարակումը վերնագրելով «Կորոնավիրուսի սպասված պատվաստանյութի թուրքական դետալը»:
Կայքը խուսափելով Հայոց ցեղասպանություն բառակապակցությունից, գրել է, որ ազգությամբ հայ Նուբար Աֆեյանի ընտանիքն Օսմանյան կայսրության ժամանակաշրջանում տեղի ունեցած 1915-ի դեպքերից հետո տեղափոխվել է Բեյրութ: Ըստ հրապարակման, Աֆեյանի հայրը՝ Պատրիկը, ծնվել է Բուլղարիայում։ Աֆեյանների ընտանիքը զբաղվել է Թուրքիայից Բուլղարիա ձվերի ներկրմամբ:
«ԱՄՆ-ի հայնտի Մասաչուսեթսի տեխնիկական համալսարանի կենսաքիմիական ճարտարագիտության ամբիոնում 1987-ին դոկտորականը պաշտպանած Աֆեյանը ոչ միայն ԱՄՆ-ում, այլ ամբողջ աշխարհում կոնֆերանսներ է կազմակերպում ձեռներեցության, ինովացիայի, կենսաքիմիայի, ճարտարագիտության, դեղագիտության, բժշկական տեխնոլոգիաների և վերականգնվող էներգիայի թեմաներով»,- եզրափակվում է հոդվածը։
