Ոչ մի կասկած չունենաք, որ մենք հաղթահարելու ենք նաև կորոնավիրուսի թողած տնտեսական հետևանքը՝ այսօր հայտարարել է վարչապետ Նիկոլ Փաշինյանը՝ նշելով, որ պատկերացնում են, թե ինչ քայլեր են պետք տնտեսական հետևանքը հաղթահարելու համար: Նա հայտնել է, որ հարցին առավել հանգամանալից կանդրադառնան առողջապահական տեսանկյունից իրավիճակի կառավարելիության հարցն էապես լուծելուց հետո:
Այս օրերին առողջապահական տագնապին զուգահեռ առանցքային խնդիրներից է տնտեսական տագնապը, որ կա թե՛ աշխարհում, թե՛, բնականաբար, Հայաստանում: Անշուշտ, համաշխարհային տնտեսական ճգնաժամը ամեն երկրի համար կունենա յուրովի անդրադարձ, որը կախված է ոչ միայն այդ երկրի կառավարության արդյունավետությունից այլ նաև տնտեսության բնույթից, պաշտպանվածությունից, դիվերսիֆիկացվածությունից, միաժամանակ նաև համաշխարհային տնտեսությանն ինտեգրվածության աստիճանից: Գուցե հնչի տարօրինակ, բայց որքան բարձր լինի ինտեգրվածության աստիճանը, այնքան ավելի մեծ կարող է լինել համաշխարհային ճգնաժամի տնտեսական հետևանքը տվյալ տնտեսության վրա: Հատկապես խոսքը փոքր տնտեսությունների մասին է, որոնք ինտեգրված են, սակայն լոկոմոտիվը չեն:
Շատ բան էապես կախված է նաև հանգամանքից, թե ինչպիսի տևականություն կպահանջի կորոնավիրուսի դեմ պայքարը թե՛ համաշխարհային, թե՛ առանձին երկրների մասշտաբով: Այն, որ կառավարությունը հավաստիացնում է տնտեսական կանխարգելիչ մեթոդների տիրապետելու, պատկերացնելու մասին, անշուշտ ողջունելի է: Մյուս կողմից, սակայն, լոկ հայտարարություններն այդ իմաստով չեն կարող լինել բավարար, և կարևոր է լինելու, թե գործնականում ինչպիսին կլինի կառավարության տնտեսական արտակարգ քաղաքականությունը:
Միևնույն ժամանակ, ինչպես առողջապահական ասպեկտի պարագայում, այնպես էլ գործնականում տնտեսական առողջության առումով շատ կարևոր է լինելու սոցիալական պատասխանատվության հանգամանքը: Բայց այս դեպքում առավել շատ բիզնեսի սոցիալական պատասխանատվության հարցը, ընդ որում՝ առավելապես խոշոր և որոշակիորեն գուցե միջին բիզնեսի շատ թե քիչ մասշտաբային դերակատարների: Անկասկած է, որ կառավարության քաղաքականությանը պետք է ավելանա գործատուների այդ լայն շրջանակի սոցիալական պատասխանատվության հանգամանքը՝ տնտեսական առողջության հնարավորինս էֆեկտիվ սպասարկման համար: