Իրանի Փորձագետների խորհրդի անդամ Հաշեմ Բաթհային մահացել է կորոնավիրուսի հարուցած հիվանդությունից: Այդ մասին մարտի 16-ին հայտնել Է IRNA գործակալությունըէ:
Նշվում է, որ քաղաքական գործչի մահը վրա է հասել Ղոմ քաղաքի հիվանդանոցներից մեկում, ուր նա տեղափոխվել էր մահվանից երկու օր առաջ:
Իրանի առողջապահության նախարարությունը երկրում նոր կորոնավիրուսով վարակվելու առաջին դեպքերի մասին հայտնել է փետրվարի 19-ին: Ախտահարվածները հայտնաբերվել են Ղոմ քաղաքում: Վերջին պաշտոնական տվյալների համաձայն, հանրապետությունում հիվանդացածների թիվը կազմում է 13 հազար 938, գրանցվել է առնվազն 724 մահ:
Փորձագետների խորհուրդը պետական մարմին է Իրանում, որի մեջ մտնում են 88 հեղինակավոր աստվածաբաններ: Դրա հիմնական գործառույթը երկրի ղեկավար եւ հոգեւոր առաջնորդին ընտրելն է:
Կորոնավիրուս է հայտնաբերվել Իրանի մի խումբ բարձրաստիճան պաշտոնյաների, ներառյալ երկրի առաջին փոխնախագահ Էսհակ Ջահանգիրիի, զբոսաշրջության, մշակութային ժառանգության եւ արհեստների նախարար Ալի Ասղար Մունեսանի եւ առեւտրի, արդյունաբերության եւ հանքերի նախարար Ռըզա Ռահմանիի մոտ: Բացի այդ, դրական են եղել երկրի Մեջլիսի (խորհրդարանի) 23 պատգամավորների անալիզների արդյունքները: Ընդ որում նրանցից երկուսը՝ Ֆաթեմա Ռահբարը եւ Մոհամադ Ալի Ռամազանին, մահացել են հիվանդությունից, հաղորդել է ՏԱՍՍ գործակալությունը:
