Մեծ Բրիտանիայի կառավարությունը մոտակա շաբաթներին պատրաստվում է երկար ժամանակով մեկուսացնել 70-նն անց բոլոր քաղաքացիներին՝ կորոնավիրուսից պաշտպանելու նպատակով, հայտարարել է առողջապահության նախարար Մեթ Հենքոքը, հաղորդում է BBC-ն:
Նրա խոսքով, նման հրահանգ դեռ չի եղել, բայց երբ դա տեղի ունենա, ապա տարեցների, ինչպես նաև ավելի երիտասարդների, որոնք առողջության հետ կապված խնդիրներ ունեն, մեկուսացումը կշարունակվի «շատ երկար ժամանակ»:
Մեծ Բրիտանիայի կառավարությունը ճնշման տակ է. երկրում կորոնավիրուսից մահացության 21 դեպք է գրանցվել: Բոլոր մահացածները 60 տարեկանից բարձր մարդիկ են կամ հարակից հիվանդություններ ունեցողներ:
Մեկուսացված քաղաքացիները պետք է մնան տանը և անհրաժեշտ մթերքների ու կենսական նշանակություն ունեցող դեղերի պաշար ունենան:
Հենքոքը հայտարարել է, որ առանց ախտանշանների մարդիկ կկարողանան այցելել տարեց հարազատներին և ընկերներին՝ երկու մետր հեռավորություն պահպանելու պայմանով:
Նրա խոսքով, առողջապահության ծառայությունը բավարար քանակությամբ թոքերի արհեստական օդափոխման սարքերով ապահովված չէ, ուստի կառավարությունը մեքենաներ, զենք արտադրողներին և բանակի մատակարարներին կառաջարկի վերափոխել իրենց ընթացիկ արտադրական գծերը:
Բացի այդ, Բրիտանիայում հյուրանոցները կարող են բռնագրավվել՝ մահճակալների քանակն ավելացնելու համար, իսկ թոշակի անցած բժիշկներն ու բուժքույրերը կվերադառնան աշխատանքի:
