Մեծ Բրիտանիայի արքայազններ Հարիի և Ուիլյամի հարաբերությունները փչացել են դեռ Մեգան Մարքլի հայտնվելուց առաջ: Այս մասին հաղորդում է The Mirror-ը՝ թագավորական ընտանիքին մոտ աղբյուրներին հղումով:
Պարբերականի տեղեկատուները պնդում են, որ եղբայրների միջև տարիներ ի վեր շարունակվող տարաձայնությունների իրական պատճառը Սասեքսի դքսի բանակում ծառայությունն էր: Ռուս պրանկերներ Վլադիմիր Կուզնեցովի (Վովան) և Ալեքսեյ Ստոլյարովի (Լեքսուս) հետ զրույցի ընթացքում արքայազն Հարին, իբր, հայտարարել է, որ «բանակում ծառայության 10 տարիները նրան շատ ավելի նորմալ են դարձրել, քան կարծում է իր ընտանիքը»:
Սասեքսի դուքսը խոստովանել է, որ 2015-ին բանակից վերադառնալուց հետո նա դժվարությամբ է հարմարվել թագավորական ընտանիքի անդամի կարգավիճակին և նույնիսկ մտածել է հրշեջ կամ ռեգբիի մարզիչ դառնալու մասին: Թագավորական ընտանիքին մոտ կանգնած աղբյուրները պնդում են, որ դեռ այդ ժամանակ արքայազն Հարիին զայրացնում էր «Ուիլյամից հետո երկրորդը» լինելու փաստը:
Պարբերականի զրուցակիցներից մեկը նշել է, որ Հարին միշտ ցանկացել է պիտանի լինել ընտանիքին, բայց նրա այդ ձգտումը միշտ անարձագանք է մնացել: «Նա պետք է լսեր հոր խորհուրդը և շարունակեր ծառայությունը: Բանակից վերադառնալը թերևս նրա ամենավատ որոշումն էր»,- նշել է աղբյուրը:
Մեկ այլ աղբյուր հավելել է, որ «կրակին յուղ է լցրել» նաև արքայազն Ուիլյամը, որը «միշտ հիշեցրել է եղբորը, թե նրանցից ում է վիճակված թագավոր դառնալ»:
Ավելի վաղ հաղորդվել էր, որ արքայազններ Հարիի և Ուիլյամի հարաբերությունները անդառնալիորեն փչացել են: Ըստ արքայական ընտանիքին մոտ կանգնած աղբյուրների, Սասեքսի դուքսը լիովին կենտրոնացած է ապագայի վրա, որը նա մտադիր է անցկացնել ոչ թե արքայական ընտանիքի, այլ իր կնոջ՝ Սասեքսի դքսուհի Մեգան Մարքլի և որդու հետ:
