Ի տարբերություն Հայաստանի Հանրապետության՝ Արցախում քաղաքական ու հասարակական կյանքն այս պահի դրությամբ ավելի հանգիստ է: Ինչպես հայտնի է՝ մարտի 31-ին սպասվում են նախագահական ու խորհրդարանական ընտրություններ, առաջադրվել է նախագահի 14 թեկնածու: Նոր տեսակի կորոնավիրուսի դեպք այս պահի դրությամբ Արցախում չի գրանցվել, թեկնածուները շարունակում են նախընտրական քարոզարշավը:
«Ազգային վերածնունդ» կուսակցության նախագահ Հայկ Խանումյանը մեր հեռախոսազանգի պահին քարոզարշավ էր իրականացնում շրջաններում: «Առաջին լրատվական»-ին Խանումյանն ասաց, որ ճիշտ է` մի քանի օր է Ստեփանակերտում չի եղել, շրջաններում մարդկանց հետ է հանդիպում և իրավիճակին շատ լավ չի տիրապետում՝ այդուհանդերձ ընտրությունները հետաձգելու անհրաժեշտություն չի տեսնում. «Հենց այս պահին էլ շարունակում ենք քարոզարշավը, անհանգստություն չկա»,-ասաց Արցախի նախագահի թեկնածուն՝ պատասխանելով Հայաստանում կորոնավիրուսի տարածման հետ կապված Արցախում ընտրությունները հետաձգելու անհրաժեշտության մասին մեր հարցին:
Արցախի նախագահի թեկնածու Արայիկ Հարությունյանի մամլո խոսնակ Վահրամ Պողոսյանն էլ «Առաջին լրատվական»-ին փոխանցեց, որ քարոզարշավն այս պահին իր բնականոն հունով շարունակվում է, Արցախում խուճապային տրամադրություններ չկան. «Մենք առաջնորդվում ենք պաշտոնական հայտարարություններով: Երկուշաբթի օրը ԱՀ պետնախարարն ու առողջապահության նախարարաը մամլո ասուլիս են հրավիրել…Եթե իրավիճակը կորոնավիրուսի տարածման հետ կապված այնքան վտանգավոր լինի, որ անհրաժեշտություն առաջանա քարոզարաշվի ձևաչափի մեջ փոփոխություններ են իրականացնել՝ մենք դա անպայման կանենք»:
Պողոսյանն ասաց, որ առաջիկայում իրենց ծրագրերի հետ կապված հանրությանը կիրազեկեն. «Համենայնդեպս շեշտեմ, որ Արցախում խուճապային տրամադրություններ չկան, մարդիկ սովորականի նման աշախատանքի են գնում: Հետևելով Հայաստանի օրինակին՝ կրթական հաստատությունները փակվել են, բայց ոչ թե երկու, այլ մեկ շաբաթով: Կտեսնենք,թե ինչ զարգացումներ են լինում՝ ըստ այդմ էլ որոշում կկայացնենք»,-եզրափակեց մեր զրուցակիցը:
