Մարտի 31-ին Արցախում համապետական ընտրություններ են, ապրիլի 5-ին՝ Հայաստանում սահմանադրական հանրաքվե։ Կորոնավիրուսի վտանգը և տարածման ռիսկերը հաշվի առնելով՝ կոչեր են հնչում Հայաստանում հանրաքվեն և Արցախում նախագահական ու խորհրդարանական ընտրությունները անհապաղ հետաձգել մինչև համաշխարհային պանդեմիայի դադարը։ Արցախում համապետական ընտրությունները հետաձգելու հարցը չի քննարկում.«Այս պահի դրությամբ մեզ մոտ նույնիսկ տագնապ չկա, այսինքն՝ չկա որևէ արձանագրված դեպք և իրականացվում են համապատասխան քայլեր։ Դասապրոցեսները երկու շաբաթով հետաձգվել են, այսինքն՝ կատարվում են պրոֆիլակտիկ քայլեր, և այս պահի դրությամբ ընտրությունները հետաձգելու անհրաժեշտություն դեռևս չկա»,-«Առաջին լրատվական»-ի հետ զրույցում ասաց Արցախի նախագահի մամուլի խոսնակ Դավիթ Բաբայանը։
Հետաքրքրվեցինք՝ արդյոք համապատասխան թեսթեր կա՞ն ստուգելու համար քաղաքացին վարակված է, թե ոչ Բաբայանը նշեց. «Կարծում եմ՝ պատշաճ կազմակերպվում է, և այս պահին չկա որևէ դեպք արձանագրված»։
Երևանից եկող քաղաքացիներին արդյոք Արցախ մտնելիս ստուգո՞ւմ են, արդյոք պատշաճ աշխատանքներ իրականացվո՞ւմ են, Բաբայանը պատասխանեց.«Երբ մեր քույրերը և եղբայրները գալիս են ՀՀ-ից, եթե իրենք վիրուսակիր են, Երևանում հավանաբար կիմանան, այս պահին կարանտին չենք հայտարարել, սահմանը բաց է, փակ սահման չկա, դեռևս ամեն ինչ նորմալ է»։
Այս պահին, նրա խոսքով, Արցախում ընտրություններին որևէ բան չի խանգարում, ո՛չ կորոնավիրուսն է այս պահին խանգարում ընտրություններին, ո՛չ էլ Ադրբեջանը, իսկ նախընտրական քարոզարշավը ընթանում է բնականոն հունով։
