ՀՀ ոստիկանության քրեական հետախուզության գլխավոր վարչության պետի տեղակալ, ոստիկանության գնդապետ Նելլի Դուրյանը, լրագրողների հետ հադիպմանը անդրադառնալով երեխաների նկատմամբ բռնության դեպքերին, նշեց, որ ոստիկանությունը աշխատում է այն երեխաների հետ, որոնք ենթարկվել են տարբեր կարգի՝ սեռական, ֆիզիկական բռնությունների:
Ամփոփելով վիճակագրական տվյալները՝ նա տեղեկացրեց, որ նախորդ տարիների համեմատ չի գրանցվել բռնությունների թվի նվազում: Նրա խոսքով, շատ են փողոցում, դպրոցում բռնության դեպքերը։ «Ունենք նաև բռնության դեպքեր ընտանիքում։ Դպրոցում հատկապես 16 տարին չլրացած երեխաների նկատմամբ 6 ամսվա կտրվածքով ամփոփված են բռնությունների դեպքերը. հանցագործությունների թիվը նվազել է 17-ով, անձերի թիվը՝ 26-ով, առաջիկայում կհրապարակվի բռնության դեպքերի հաշվետվությունը»,- ասաց Ն. Դուրյանը:
Անդրադառնալով ընտանեկան բռնությունների հարցին՝ նա ասաց, որ ընտանեկան բռնության հարցը վերջին մի քանի տարիներին է բարձրաձայնվում, այդ մասին սկսել են խոսել միայն վերջին տարիներին: Ըստ Նելլի Դուրյանի՝ ոստիկանությունը սկսել է լրջորեն զբաղվել այդ հարցով։ «Չենք կարող ասել, որ դեպքերը շատ են, բայց կան: Սա այն խնդիրներից է, երբ հարցը հաճախ դուրս չի գալիս ընտանիքից: Բռնության ենթարկվածները հաճախ ամաչում են այդ մասին բարձրաձայնել»,- ասաց Դուրյանը՝ նշելով, որ եթե հայտնաբերվում են նման զոհեր, ապա իրենք համագործակցում են տարբեր կառույցների՝ աշխատանքի և սոցիալական հարցերի նախարարության, կանանց իրավունքի կենտրոնի, երեխաների աջակցության կենտրոնի հետ: