Նավթի համաշխարհային գները 3 տոկոսով իջնում են այն մասին հաղորդումներից հետո, որ սաուդյան Saudi Aramco-ն և Էմիրությունների ADNOC-ը պատրաստ են ավելացնել արտադրական կարողությունները, ինչի մասին վկայում են սակարկությունների տվյալները։ Այս մասին տեղեկացնում է RIA Novosti-ն։
Երևանի ժամանակով 14:10-ի դրությամբ Brent մակնիշի նավթային խառնուրդի՝ մայիսի ապառնագրերի արժեքն ընկել է 3.06 տոկոսով՝ բարելի դիմաց մինչև 36,08 դոլար, WTI մակնիշի նավթի՝ ապառնագրերի արժեքը՝ 3,26 տոկոսով՝ բարելի դիմաց մինչև 33,24 դոլար: Մարտի 11-ին ավելի վաղ սաուդյան Saudi Aramco-ն՝ աշխարհի խոշորագույն նավթընկերությունը, հայտնել է, որ թագավորության էներգետիկայի նախարարությունից հրահանգ է ստացել իր արտադրական կարողություններն օրական 12 միլիոն բարելից ավելացնել մինչև 13 միլիոն բարել:
Աբու Դաբիի ազգային նավթընկերությունը (ADNOC) նույնպես հայտնել է, որ ապրիլին պլանավորում է համաշխարհային շուկային նավթի մատակարարումներն ավելացնել օրական մինչև ավելի քան 4 միլիոն բարել և պատրաստ է ավելացնել իր պլանային արտադրական կարողությունները։