ԱՄՆ Կոլորադո նահանգում գործող տեղի թուրքական համայնքի կողմից ստեղծված «Multicultural Mosaic Foundation» («Բազմամշակութային խճանկարի հիմնադրամ», MMF) ոչ կառավարական կազմակերպությունը ճանաչել է Հայոց ցեղասպանությունը։
Հիմնադրամը, որի գործունեությունը կապում են նաև թուրք իսլամական քարոզիչ Ֆեթուլլահ Գյուլենի հետ, կողմ է քվեարկել Ցեղասպանության ճանաչմանը մարտի 7-ին, տեղեկացնում է Mirror spectator-ը:
MMF-ը երեք տարի առաջ հանձնաժողով է ստեղծել 1915–ին Օսմանյան կայսրությունում հայերի հետ տեղի ունեցած իրադարձություններն ուսումնասիրելու նպատակով։ 20 հոգանոց հանձնաժողովը երեք տարվա աշխատանքի արդյունքում որոշել է կազմակերպության խորհրդում քվեարկության ներկայացրել Հայոց ցեղասպանության ճանաչման հարցը։
«Երեք տարիների ընթացքում հանձնաժողովի անդամները դասախոսությունների և քննարկումների են այցելել Օսմանյան և Հայոց պատմություններն ուսումնասիրող մասնագետների մասնակցությամբ, ինչպես նաև հանդիպել են Ցեղասպանությունից փրկվածների ընտանիքների անդամների հետ, վավերագրական ֆիլմեր են նայել»,- ասվում է կազմակերպության կողմից տարածված մամլո հաղորդագրությունում: