«Ժողովուրդ» թերթը գրում է. «Այսօր ՀՀ վարչապետ Նիկոլ Փաշինյանը Սյունիքի մարզից կսկսի սահմանադրական փոփոխությունների մարզային քարոզարշավը: Եվ, ահա, ըստ մեր տեղեկությունների՝ վարչապետն առավոտյան ուղղաթիռով միանգամից իջնելու է Սյունիքի մարզի Ագարակ քաղաք, որտեղից էլ նախատեսված է սկսել քարոզարշավը: «Ժողովուրդ» օրաթերթի տեղեկություններով՝ այս օրերին Սյունիքի մարզի բոլոր համայնքներում աժիոտաժ է տիրում, քանի որ բոլորը ցանկանում են հավուր պատշաճի դիմավորել Նիկոլ Փաշինյանին:
Երեկ դա «Ժողովուրդ» օրաթերթի հետ զրույցում հաստատեց նաև Մեղրիի քաղաքապետ Մխիթար Զաքարյանը՝ հայտարարելով, թե իրենք պատրաստվում են դիմավորել վարչապետին: «Իհարկե պատրաստվում ենք, հանրապետության վարչապետն է գալիս, մենք մեր մասով, կոմունալ ծառայությունը՝ իր մասով, մաքրությունը և այլն, այդքանը: Դե մենք միշտ էլ մաքրությունով զբաղվում ենք, բայց վաղը մի քիչ տարբերություն պետք է լինի էլի, ամեն դեպքում, լիքը հյուրեր են գալու մայրաքաղաքից, գան, ավելի մաքուր տեսնեն մեր համայնքը», – մեզ հետ զրույցում նշեց նա:
Նկատենք, որ սահմանադրական փոփոխությունների՝ «Այո»-ի ակտիվ քարոզարշավ իշխանության ներկայացուցիչներն, ըստ էության, սկսել են միայն մարտի 7-ից, իսկ մինչ այդ նախապատրաստական աշխատանքներ էին: Եվ պատգամավորները, վարչապետից զատ, այս օրերին գնում են տնից տուն, անձամբ բուկլետ բաժանում և շփվում բնակիչների հետ: Իսկ, ահա, վարչապետը քարոզարշավ կանցկացնի նաև հանրահավաքների միջոցով: Նշենք, որ վարչապետ Նիկոլ Փաշինյանը այսօրվանից արձակուրդ է վերցնում:
«Ժողովուրդ» օրաթերթը նաև տեղեկացավ, որ այսօրվա քարոզարշավին Նիկոլ Փաշինյանին կուղեկցեն «Այո»-ի շտաբի պետ Սուրեն Պապիկյանն ու Սյունիքի մարզից վարկանիշային ընտրակարգով ընտրված պատգամավորները»:
Առավել մանրամասն՝ թերթի այսօրվա համարում:
