«Պոպուլուս» հանրային կարծիքի ուսումնասիրություններով զբաղվող ընկերությունը հրապարակել է հետազոտություն, համաձայն որի` Սերժ Սարգսյանը մնում է այն քաղաքական գործիչը, ում օգտին առավելագույնը կքվեարկեին, եթե կրկին տեղի ունենային ՀՀ նախագահի ընտրություններ: «Նա գրեթե երեք անգամ ավելի շատ կողմնակիցներ ունի (28%), քան հաջորդ առավել ուժեղ հնարավոր թեկնածուն` Գագիկ Ծառուկյանը (10%)»,- նշված է հետազոտության մեջ: Սրանից զատ` հետազոտության մեջ նշված է, որ կան քաղաքական գործիչներ ու կուսակցություններ, որոնց բնակչության որոշ հատված ձայն չէր տա, և որ հարցվողների քառորդից ավելին (27%) ասում է, որ երբեք չի քվեարկի Լևոն Տեր-Պետրոսյանի օգտին: «Նույն հաջողությամբ կարելի էր Սադամ Հուսեյնի կառավարման ժամանակ հարցում անցկացնել Սադամ Հուսեյնի ժողովրդականության մասին: Վստահ եմ, որ շատ մաքուր հարցման արդյունքներով, Սադամ Հուսեյնը կստանար իննսունինը տոկոս աջակցություն: Հայաստանում հասարակությանն ահաբեկելու ծավալներն այնքան մեծ չեն, որքան Իրաքում, դրա համար էլ Սերժ Սարգսյանը ստացել է 28 %: Ենթադրենք, թե այդ կազմակերպությունն անցկացրել է օբյեկտիվ սոցիոլոգիական հարցում: Այդ դեպքում հարց է ծագում` ինչպե՞ս: Միգուցե բացել են տեղական ֆիրմա՞ սոցիոլոգիական հարցման համար: Ովքե՞ր են այդ հարցումներն անցկացնողները. մեր տեղացի մասնագետնե՞րը, թե՞ արտերկրից են ժամանել և թարգմանիչների միջոցով անցկացրել սոցհարցումները: Սրանք հարցեր են, որոնք պատասխան են պահանջում»,- սոցհարցումների մասին «Առաջին լրատվական»-ի հարցին այսպես արձագանքեց Հայ ազգային կոնգրեսի համակարգող Լևոն Զուրաբյանը: ՀԱԿ համակարգողը մեր զրույցի ժամանակ նշեց, որ Հայաստանում գոյություն չունի սոցիոլոգիա, և ոչ մի տեղական սոցիոլոգիական կենտրոն չի տրամադրում ճշգրիտ տեղեկատվություն և չի կարող տրամադրել երկու պատճառով: Առաջինն, ըստ Լևոն Զուրաբյանի, այն է, որ մեր հասարակության մեծամասնությունը վախի մթնոլորտի պատճառով չի ասում այն, ինչ մտածում է, և երկրորդ` իշխանությունները թույլ չեն տալիս սոցիոլոգիական ծառայություններին օբյեկտիվ հարցումներ անցկացնել և հրապարակել: «Առաջին լրատվական»-ի հետ զրույցում Լևոն Զուրաբյանը տեղեկացրեց, որ իր մտերիմ սոցիոլոգներից մեկը խոստովանել է, որ հրաժարվում է քաղաքական սոցհարցումներ անցկացնել, քանի որ Հայաստանում հնարավոր չէ օբյեկտիվ հարցումները հրապարակելը: Սոցիոլոգը, ըստ Զուրաբյանի, նշել է, որ իրենց վրա իշխանությունը գործադրում է ամեն տեսակ ճնշումներ, ընդհուպ մինչև` մարդուն վերացնելը: Իսկ «Պոպուլուսի» ներկայացրած այն տվյալները, որ հայաստանցիների միայն 3%-ը իր քվեն կտա Հայ ազգային կոնգրեսին, Լևոն Զուրաբյանը համարեց ծիծաղելի: «ՀԱԿ-ը միակ քաղաքական ուժն է, որը հազարավոր մարդկանց փողոց է հանում և հանրահավաք անցկացնում: Չկա մեկ այլ քաղաքական ուժ, որը կարողանա ոչ միայն այդպիսի մարդաշատ հանրահավաք անցկացնել, այլև որևէ զանգվածային միջոցառում»,- ասաց նա: