ԱՄՆ-ի Նյու Ջերսիի նահանգից սենատոր Քորի Բուքերը, որն ավելի վաղ հավակնում էր Դեմոկրատական կուսակցությունից առաջադրվելու ԱՄՆ-ի նախագահի պաշտոնի թեկնածու, հանդես է եկել հաջակցություն երկրի նախկին փոխնախագահ Ջոզեֆ Բայդենի ընտրարշավի:
«Բայդենը կվերականգնի Օվալաձեւ կաբինետի պատիվը եւ կզբաղվի առավել հրատապ խնդիրների լուծմամբ: Ահա թե ինչու եմ ես հպարտ պաշտպանելու Ջոյին»,- մարտի 9-ին գրել է սենատորը Twitter-ում: Ավելի վաղ ի պաշտպանություն Բայդենի հանդես են եկել դեմոկրատների նախընտրական մրցարշավի մի քանի այլ նախկին մասնակիցներ, որոնց թվում են՝ Կալիֆոռնիայի նահանգից սենատոր Քամալա Հարիսը, Մինեսոթայից սենատոր Էմի Քլոբուշարը, Սաութ Բենդ քաղաքի (Ինդիանայի նահանգ) նախկին քաղաքագլուխ Փիթ Բութեջաչը, Տեխասից նախկին կոնգրեսական Բեթո Օ՛Ռուրքը: Վերջին շաբաթներին հայտնի Է դարձել, որ դեմոկրատներից ԱՄՆ-ի նախագահի թեկնածու առաջադրվելու համար հիմնական պայքարն ընթանում է Բայդենի եւ Վերմոնտի նահանգից սենատոր Բեռնի Սանդերսի միջեւ: ԱՄՆ-ի նախագահի 59-րդ ընտրությունները տեղի կունենան նոյեմբերի 3-ին: Դրանցում Հանրապետական կուսակցությունից թեկնածուն, ինչպես սպասվում է, կլինի ԱՄՆ-ի գործող նախագահ Դոնալդ Թրամփը, հաղորդել Է ՏԱՍՍ-ը: