Մարտի 8-ին Բաքվի կենտրոնում տեղի է ունեցել Ադրբեջանի ֆեմինիստական շարժման (FDA) երթը «Փողոցներն ազատ են մեզ համար» կարգախոսով:
Ժամը 15։00-ի սահմաններում, ցուցարարները սկսել են երթ՝ վանկարկելով «Մի դիմացիր դաժանությանը, մի լռիր դաժանություն տեսնելով», «Կանայք միավորվե՛ք, ո՛չ լռությանը, այո՛ ապստամբությանը» կարգախոսները:
Նիզամի փողոցում ոստիկանությունը արգելափակել է նրանց ճանապարհը: Ոստիկանությունը հրմշտոց է հրահրել Բաքվի նեղ փողոցներում, որոնցով փորձել են անցնել ցուցարարները: Ոստիկանությունը կանանց բերման չի ենթարկել, սակայն բողոքող աղջիկներին աջակցող մի քանի երիտասարդները բերման են ենթարկվել:
Բաքվում երթը իշխանությունների հետ համաձայնեցված չի եղել: Այնուամենայնիվ, դրա կազմակերպիչները, նախքան հավաքի մեկնարկը հրապարակել են կոչ, որում ասվում է, որ նրանք դեմ են Ադրբեջանում աղջիկների և կանանց սպանությանը, սելեկտիվ աբորտներին, գենդերային խտրականությանը, կանանց նկատմամբ բռնություններին, վաղաժամ և հարկադիր ամուսնություններին և աղջիկների դպրոց հաճախելու արգելքին, ինչը կիրառվում է որոշ ընտանիքներում և համայնքներում: