Ապրիլի 5-ին կայանալիք սահմանդրական փոփոխությունների հանրաքվեն նշանային է լինելու Հայաստանի համար: Դրա նշանակության, կարևորության և քարոզարշավի ընթացքի մասին «Առաջին լրատվական»-ի տաղավարում զրուցել ենք ԱԺ անկախ պատգամավոր Արման Բաբաջանյանի հետ: Սահմանադրական հանրաքվեն իրականում շատ ավելի խորքային է, քան դատարանի մի քանի անդամների ու նախագահի փոփոխությունը։ Այս հանրաքվեն սահմանդրությունը, սահմանադրական կարգը ժողովրդին վերադարձնելու եզակի միջոց է։ Որքանով սրա գիտակցումը կա մեր հանրության շրջանում և ինչ է արվում բավարար չափով իրազեկելու համար:
«Սկսել ենք մասնակցել քարոզարշավին և «Այո» քարոզել… Արդեն գույքագրում ենք տրամադրությունները և այն խնդիրները, որոնք առկա են: Փորձում ենք հասկանալ՝ ինչ ուղերձներ են անհրաժեշտ, որպեսզի կարողանանք մոտիվացնել մարդկանց՝ ապրիլի 5-ին ժամանակ տրամադրել սեփական ճակատագրի, սեփական երկրի ապագայի համար, մասնակցել հանրաքվեին և անհրաժեշտ «Այո»-ն ասել այս կարևոր հանգրվանում: Կարծում եմ՝ մենք ճիշտ ճանապարհի վրա ենք, և ընդհանուր տրամադրությունները դրական են»,- նշեց Արման Բաբաջանյանը:
Նա նաև հավելեց, որ պարզ գյուղացուն հետաքրքրում է՝ թե ինչու ենք ՍԴ կազմի վերաբերյալ հարցը դարձրել հանրաքվեի հարց, և հավելեց, որ գյուղացին դա չի համարում իր լուծելիք հարցը, իսկ դրանից օգտվում են հակառակ ճամբարի ներկայացուցիչները՝ կոչ անելով չմասնակցել հանրաքվեին՝ այս գործընթացը համարելով անկարևոր:
«Մենք պետք է կարողանանք արմատավորել այն միտքը, որ պետք է վերացնել երկրի զարգացման խոչընդոտը, որը ՍԴ-ն է՝ այս կազմով, և որ այս ՍԴ-ով չենք կարող հավակնել սահմանադրական փոփոխությունների մեծ փաթեթի»,- նշեց պատգամավորը: Նա նաև ընդգծեց, որ Սերժ Սարգսյանի և Ռ. Քոչարյանի աջակիցներն ու քրեական տարրերը «Ոչ»-ի միջոցով ռևանշի շանս են տեսնում:
Մանրամասն՝ տեսանյութում: