«Սասնա ծռեր» կուսակցությունը արել է Սահմանադրական հանրաքվեն չեղարկելու անսպասելի կոչ, հիմնական հղումն անելով կորոնավիրուսի վտանգին և այն տարածելու ռիսկին: Կուսակցությունը իշխանությանը կոչ է անում ՍԴ հարցը լուծել Ազգային ժողովով: Ստացվում է հետաքրքիր պատկեր, երբ նախկին իշխող համակարգի հանդեպ արմատական դիրքավորում ունեցող կուսակցությունը, քաղաքական ուժը, հանրաքվեի հարցում փաստորեն դիրքավորվում է նախկին համակարգի տրամաբանության, դիրքորոշման շրջանակում: Որովհետև կորոնավիրուսի վտանգի պատճառով կամ առիթով հանրաքվեն չեղարկելու կոչերի հիմնական ալիքը գալիս է նախկին իշխող համակարգից և դրան մերձ շրջանակներից: Այստեղ դարձյալ անհրաժեշտ է արձանագրել մի բան, որ, անշուշտ, միանգամայն օբյեկտիվորեն առկա է մտահոգության հիմք, և նույնքան օբյեկտիվորեն կարող է կայացվել որոշում՝ կախված իրավիճակից: Ամբողջ հարցն այն է, սակայն, որ Հայաստանում վիճակը ոչ միայն վատ չէ, այլ դատելով անգամ միջազգային փորձագիտական գնահատականներից՝ բավականին լավ է, և առայժմ չկան այդօրինակ եզրահանգումների համար անհրաժեշտ կամ բավարար հիմքեր:
Այդուհանդերձ, քաղաքականության համար, իհարկե, ամեն ինչ է որևէ նոր վիճակ ստեղծելու հիմք, և թե՛ նախկին համակարգը, թե՛ նաև այդ համակարգի հանդեպ արմատական դիրքորոշում ունեցող «Սասնա ծռերը» փորձում են օգտագործել առողջապահական վիճակը քաղաքական նոր իրողություն ստեղծելու համար: Եվ այն, որ նրանք փաստորեն հայտնվում են այդ հարցում նույն դիրքում, ամենևին հիմք կամ առիթ չէ խոսելու, որ կա, այսպես ասած, համատեղ որևէ ստվերային պայմանավորվածություն կամ խորհրդապահական գործընթաց: Հակառակը, ՍԾ դիրքորոշումը վկայում է, որ Սահմանադրական հանրաքվեն՝ որպես քաղաքական գործընթաց, շատ ավելի լայն ու բազմաշերտ է, քան լոկ ՍԴ դատարանակազմի հարցի լուծումը, և այդ բազմաշերտությունն ու լայնաշերտությունն է, որ ինչ-որ կետում հանգեցրել է արմատական հակադրության մեջ գտնվող միավորների փաստացի համաձայնություն մեկ կետում: Բայց, քանի որ շերտերը շատ են, ապա այդ համաձայնությունն ավելի շատ իրավիճակային է, իսկ խորքում գործընթացներն ունեն այլ տրամաբանություն:
Բանն այն է, որ Սահմանադրական հանրաքվեն Հայաստանում լինելու է հետհեղափոխական քաղաքական ռեստարտի, քաղաքական դաշտի վերախմբավորման, վերադիրքավորման, նոր քաղաքական հարաբերակցության սկզբնավորման կամ արմատավորման փուլ: Դա կասկածից վեր է: Թե ինչ դինամիկա և արդյունքի նշմարման ինչ ժամանակագրություն կունենա այդ փուլը, կախված է իհարկե այլ հանգամանքներից էլ, սակայն աներկբա է, որ հանրաքվեն այդ իմաստով ձևավորելու է բավականին հաստատուն իրողություններ: Ըստ այդմ, բոլորովին տարբեր է դառնում, օրինակ, հանրաքվեի չեղարկումը և, ասենք, հանրաքվեի անցկացման պայմաններում «Այո»-ի անհաջողությունը, կամ նվազ հաջողությունը: Հանրաքվեի չեղարկումն ու «Ոչ»-ի հաղթանակը կամ հաջողությունը քվեարկությամբ, դրանք արմատապես տարբեր բաներ են: Երբ հանրաքվեի չեղարկում է պահանջում «Ոչ»-ը, այդ դիրքում գտնվող ուժերը, հիմնավորապես նախկին իշխող համակարգը, ապա դա փաստորեն ունի բոլորովին այլ ներգործություն թե՛ հանրության, թե՛ հանրաքվեն նախաձեռնող մեծամասնության տրամադրության վրա: Եվ բոլորովին այլ ազդեցություն ու ներգործություն կարող է ունենալ «Սասնա ծռերի» այդպիսի կոչը: Նույնքան վեր է կասկածից, որ կոչի հիմքում ոչ թե կորոնավիրուսի տարածման, այլ պարզապես սեփական քաղաքական հեռանկարների հետ կապված մտավախություններ են: Ի վերջո, հարկ է հիշել, որ կուսակցությունը ամիսներ առաջ հայտարարեց նաև, որ այլևս արմատական ընդդիմություն է դիրքավորվում նաև նոր կառավարության և կառավարող մեծամասնության նկատմամբ: Հանրաքվեի գործընթացը, որևէ արդյունքի պարագայում, կարող է էապես սահմանափակել Հայաստանում այդօրինակ ընդդիմության «մթնոլորտային պահանջարկը»: