Գյումրու Վարդան Աճեմյանի անվան դրամատիկական թատրոնում ավարտվեցին ապրիլյան քառօրյա պատերազմին նվիրված «Հարսանիք թիկունքում» ներկայացման էկրանավորման աշխատանքները: Գյումրու դրամատիկական թատրոնի տնօրեն Լյուդվիգ Հարությունյանը «Առաջին լրատվական»-ի հետ զրույցում նշեց, որ հավաքվել էր պրոֆեսիոնալների խումբ. «12-13 ժամ սիրով աշխատում էինք, դժվարություններ կային, բայց ամեն ինչ հարթ ընթացավ»:
Հիշեցնենք՝ «Հարսանիք թիկունքում» ներկայացման էկրանավորման ստեղծագործական խմբի անդամներից են՝ պիեսի հեղինակ Անահիտ Աղասարյան, բեմադրության հեղինակ՝ Լյուդվիգ Հարությունյան, էկրանավորման ռեժիսոր՝ Արշալույս Հարությունյան, օպերատոր՝ Սուրեն Թադևոսյան:
Ներկայացումը Հայաստանում և երկրից դուրս բեմադրվել է ավելի քան 70 անգամ՝ լեփ-լեցուն դահլիճներում: «Շատ հրավերներ ունեինք, տեխնիկական պատճառներից ելնելով՝ չկարողացանք ընդունել հրավերը և ներկայացումն այդ տեղերում խաղալ: Տիգրան Վիրաբյանի կողմից ներկայացումն էկրանավորելու առաջարկ եղավ: Արդյունքում մենք ունեցանք շատ գեղեցիկ ֆիլմ, որը կարող է ցուցադրվել շատ երկրներում: Սցենարային փոփոխությունը դետալային է եղել: Ֆիլմում էմոցիաներն ավելի ցցուն կլինեն: Ներկայացման էկրանավորումը չի խանագարի, որ այն նորից խաղան բեմում»,- նշեց Լ. Հարությունյանը:
«Հարսանիք թիկունքում»-ը ոչ միայն ապրիլյանի հերոսների մասին է, այլ հերոսներ ծնող մայրերի, նրանց հարազատների. կռիվ էին տալիս նաև այստեղ՝ թիկունքում, ու այստեղ էլ ներքին պատերազմ էր: Թատրոնում մարտի դաշտ չի ներկայացվել… Թատրոնի հնարավորությունն այլ է՝ պետք է ավելի շատ ապրումներ ցույց տաս, ներքին կռիվը պետք է զգան կերպարների աչքերի մեջ,- նշեց Լ. Հարությունյանը:- Ներկայացման գլխավոր ասելիքը նաև այն է, որ թիկունքում միշտ պետք է պատրաստ լինենք… Ապրիլյան քառօրյաներ հնարավոր է նորից լինեն, միշտ պետք է պատրաստ լինենք, և ամուր լինենք»:
Մանրամասն՝ տեսանյութում: