Վրաստանի խորհրդարանը հավանաբար կանցնի հեռավար աշխատանքի. որի դեպքում օրինագծերը կքննարկվեն էլեկտրոնային ձևաչափով և կընդունվեն էլեկտրոնային քվեարկությամբ՝ տեղեկացնում է Sputnik-ը:
Կորոնավիրուսի տարածման սպառնալիքի կապակցությամբ աշխատանքի այդ մեթոդին անցնելու հավանականության մասին խորհրդարանի բյուրոյի՝ մարտի 6-ին կայացած նիստում հայտարարել է օրենսդիր մարմնի խոսնակ Արչիլ Տալակվաձեն:
Նա իրավաբանական հարցերի կոմիտեին և իրավաբանական դեպարտամենտին հանձնարարել է քննարկել այդ նախաձեռնության տեխնիկական և իրավական կողմերը:
«Եկեք բոլորս միասին մտածենք և պատրաստենք նախաձեռնություն, որը հատուկ դեպքերում խորհրդարանին թույլ կտա օրինագծերը քննարկել էլեկտրոնային ձևաչափով և էլեկտրոնային քվեարկություն անցկացնել որոշումներ ընդունելու համար»,- հայտարարել է Արչիլ Տալակվաձեն:
Կորոնավիրուսի տարածման սպառնալիքի կապակցությամբ Վրաստանում բազմաթիվ հիմնարկություններ և բարձրագույն ուսումնական հաստատություններ սկսել են անցնել հեռավար աշխատանքի:
Մարտի 6-ի դրությամբ Վրաստանում գրանցվել է կորոնավիրուսով վարակման արդեն ինը դեպք: