Իդլիբի դեէսկալացիայի գոտում ռազմական գործողությունների դադարեցման ռեժիմը, որը համաձայնեցվել է Ռուսաստանի և Թուրքիայի նախագահների կողմից, պաշտոնապես ուժի մեջ է մտել մարտի 6-ի 00:01-ին:
Համաձայնության ձեռքբերման մասին հայտարարել է Ռուսաստանի արտաքին գործերի նախարար Սերգեյ Լավրովը՝ ամփոփելով երկու երկրների ղեկավարների՝ ավելի քան հինգ ժամ տևած բանակցությունների արդյունքները: Լավրովն ընթերցել է երկու պետությունների ղեկավարների համատեղ հայտարարությունը, որում ասված է 2020 թվականի մարտի 6-ի 00:01 րոպեից բոլոր մարտական գործողությունների դադարեցման մասին «Իդլիբի դեէսկալացիայի գոտու գոյություն ունեցող շփման գծում»:
Մոսկվայում կայացած հանդիպմանը Պուտինը եւ Էրդողանը նաև համաձայնեցրել են մի շարք այլ միջոցառումներ: Մասնավորապես, մարտի 15-ից ՌԴ-ն և Թուրքիան կսկսեն համատեղ պարեկումը Սիրիայի M4 մայրուղում, որի երկայնքով կստեղծվի անվտանգության միջանցք: Երկու նախագահները նաև վճռականությունեն հայտնել ոչնչացնելու Սիրիայում գործող բոլոր ահաբեկչական խմբավորումները: