Թուրքիայի նախագահ Ռեջեփ Թայիփ Էրդողանը դատական հայց է ներկայացրել գլխավոր ընդդիմադիր Ժողովրդական հանրապետական կուսակցության խորհրդարանական խմբակցության ղեկավարի տեղակալ Էնգին Օզկոչի դեմ՝ պահանջելով փոխհատուցում նրանից վիրավորանքի համար: Այս մասին հայտարարել է Էրդողանի փաստաբան Հուսեյն Այդինը՝ գրում է RIA Novosti-ն:
Ավելի վաղ Օզկոչը մեղադրել էր Էրդողանին «քելլե» բառը (դիակի կոպիտ անունը) օգտագործելու համար, երբ վերջինս խոսել է սպանված թուրք զինվորականների մասին, ինչպես նաև դավաճանության համար, քանի որ, ըստ պատգամավորի, նախագահի երեխաները խուսափել են զինվորական ծառայությունից: Այս հայտարարության պատճառով զանգվածային ծեծկռտուք է սկսվել Թուրքիայի խորհրդարանում իշխող «Արդարություն և զարգացում» կուսակցության և ԺՀԿ-ի պատգամավորների մասնակցությամբ:
«Մենք հայց ենք ներկայացրել Օզկոչի դեմ մեկ միլիոն լիրայի չափով բարոյական փոխհատուցման համար՝ մեր նախագահի դեմ կոպիտ և կեղտոտ հայտարարությունների պատճառով: Մենք նաև նրան մեղադրել ենք նախագահին վիրավորելու մեջ», – գրել է Այդինը Twitter-ում:
Ըստ «Հուրիեթ» թերթի՝ Անկարայի գլխավոր դատախազությունը հետաքննություն է սկսել Օզկոչի դեմ ՝ նախագահին վիրավորվելու համար:
