Չինաստանում կորոնավիրուսի պատճառով սուր կերպով ծառացել է բժշկական թափոնների, մանավորապես, բժշկական դիմակների օգտահանման խնդիրը: Այդ մասին մարտի 5-ին գրել է South China Morning Post (SCMP) թերթը՝ տեղեկացնում է interfax-ը:
Բժշկական դիմակների պահանջարկն աճում է ամբողջ աշխարհում, Չինաստանն օրական արտադրում է շուրջ 116 միլիոն դիմակ: Դրա հետևանքով բժշկական թափոնների ծավալն զգալիորեն աճել է երկրի ամբողջ տարածքում՝ նշում է թերթը: ՉԺՀ-ն չի հայտնում բժշկական թափոնների օգտահանման համար աղբայրիչ կայանքների թիվը, սակայն փորձագետները կարծում են, որ վերջին տասնամյակում այն չի փոխվում: Օրինակ՝ Ուհանում՝ կորոնավիրուսի էպիկենտրոնում, անցյալ շաբաթ բժշկական թափոնների ծավալը քառապատիկ աճել է՝ օրական մինչև 200 տոննա:
Սակայն այդ քաղաքում բժշկական աղբի օգտահանման միակ ձեռնարկությունը կարող է օրական վերամշակել 50 տոննա թափոնից ոչ ավելի: Դրա հետևանքով Ուհանում հիվանդանոցների մոտ կուտակվում են օգտագործված բժշկական դիմակների և պաշտպանության այլ միջոցների կույտեր՝ հաղորդել է South China Morning Post-ը: Ուհանի իշխանությունները փորձում են խնդրի լուծում գտնել: Նրանք մյուս աղբայրիչ ձեռնարկությունները վերապրոֆիլավորում են բժշկական թափոնների օգտահանման համար և լրացուցիչ պահեստարաններ են ստեղծում այդ աղբի համար: Նաև Ուհանը թափոնների մի մասն օգտահանման համար ուղարկում է հարևան քաղաքներ և պլանավորում է վերամշակման համար ավելի շատ ձեռնարկություններ կառուցել հիվանդանոցների շրջանում՝ նշում է թերթը:
