Հավատացնում ենք ձեզ, պարոն վարչապետ, որ անկախ քաղաքական հայացքներից լինելու ենք ձեր կողքին, հայտարարել է ԵԿՄ նախագահ, ԱԺ պատգամավոր Սասուն Միքայելյանը: Այդ հայտարարոթյունը նա արել է Վազգեն Սարգսյանի ծննդյան տարեդարձին նվիրված միջոցառմանը, որին մասնակցել է նաև վարչապետ Նիկոլ Փաշինյանը: Սասուն Միքայելյանը հայտարարել է, որ կանգնելու են Փաշինյանի կողքին, հեղափոխությունը պաշտպանելու համար:
Հայտարարությունն իսկապես բազմիմաստ է, կամ բազմաշերտ, կամ ավելի շուտ ի ցույց է դնում Հայաստանի բազմաշերտ խնդիրները, մասնավորապես կապված համակարգային արդիականացման և դրանում ԵԿՄ գործոնի հետ: Տարիներ շարունակ, գործնականում հենց ստեղծումից ի վեր ԵԿՄ-ն ներգրավվել է քաղաքական գործընթացներում և եղել իշխանության առանցքային հենարաններից մեկը: ԵԿՄ-ն ռազմական կառույց չէ, կիսառազմականացված կառույց է, լրագրողների հետ զրույցում ասել է Սասուն Միքայելյանը:
Փաստացի, կա կիսառազմականացված կառույց, որը դե յուրե հասարակական կազմակերպության կարգավիճակում է, դե ֆակտո որոշակիորեն շարունակում է ներգրավված լինել քաղաքականության մեջ: Եվ այդ ամենով հանդերձ էլ աներկբա է, որ պատերազմող, և պատերազմով ծնված պետության մեջ ռազմական վետերանների հանրային, կամ սոցիալիզացիայի խնդիրը անխուսափելի խնդիր է, կառավարման կարիք ունեցող: Ինչպե՞ս լուծել այդ հարցերը, որպեսզի ԵԿՄ-ն լինի հետպատերազմական սոցիալիզացիայի ինստիտուտ, բայց չլինի ռազմականացված և առավել ևս քաղաքականության ձեռքից բռնած, եթե ոչ քաղաքականությանը գրկախառնված: Նախորդ քառորդ դարում Հայաստանը տեսել է այդ ամենի հետևանքը:
Նոր ժամանակաշրջանում ԵԿՄ լեգիտիմությունն ու քաղաքական այսպես ասած կառուցողականությունը ընդամենը պայմանավորված է նրանով, որ աջակցում է լեգիտիմ վարչապետ Նիկոլ Փաշինյանին: Իսկ, եթե հանկարծ առաջանան խնդիրներ ԵԿՄ-վարչապետ հաղորդակցության հարցում: Կամ, եթե խնդիրներ առաջանան հանրություն-վարչապետ հաղորդակցության հարցում: Ի վերջո մենք պատկերացնում ենք չէ, որ պետք է կառուցենք Հայաստան, որը ապրելու է ավելի երկար, քան որևէ լեգիտիմ վարչապետ կամ քաղաքական առաջնորդ: Եվ մենք կառուցում ենք Հայաստան, որն ապրելու է անկախ որևէ քաղաքական առաջնորդից: Դա է անվտանգ և զարգացող Հայաստանի բանաձևը: Ըստ այդմ, քաղաքական մրցակցությունը Հայաստանում չունի այլընտրանք: Եվ ուրեմն, երկարաժամկետ հեռանկարում ո՞րն է ԵԿՄ «կիսառազմականացված» հասարակական կառույցի տեղն ու դերը հասարակական-քաղաքական կյանքում: Լիովին հասկանալի է, որ ներկայիս հետհեղափոխական իրողությունների և անցման շրջանում Նիկոլ Փաշինյանին մի կողմից պետք չէ կոնֆլիկտ ԵԿՄ հետ, մյուս կողմից նաև բավականին բարդ է իրականացնել խնդրի արագ տրանսֆորմացիա: Բայց, այդուհանդերձ, Հայաստանի քաղաքական օրակարգում պետք է հայտնվեն այդ հարցերն ու սկսեն քննարկվել: Ի վերջո, չի կարող իրավիճակը մնալ Սասուն Միքայելյանի, Նիկոլ Փաշինյանի կամ որևէ ցանկացած գործչի բարի կամքի հույսին: