2020 թվականի մարտի 31-ին Արցախում սպասվում են համապետական ընտրություններ․ ընտրելու են նախագահ և ձևավորելու են Ազգային ժողով։
Առաջադրվել է նախագահի 14 թեկնածու, որոնցից մեկը դուք եք։ Կներկայացնե՞ք ձեր ծրագրային դրույթներից հիմնականներին․ «Առաջին լրատվական»-ի հարցին Արցախի պահպանողական կուսակցության նախագահ, Արցախի նախագահի թեկնածու Դավիթ Բաբայանը պատասխանեց․ «Ես առաջադրվել եմ Արցախի պահպանողական կուսակցության կողմից։ Ես՝ որպես Արցախի նախագահի թեկնածու, և Արցախի պահպանողական կուսակցությունը՝ որպես Արցախի խորհրդարանական ընտրություններին մասնակցող ուժ, ունենք միևնույն ծրագիրը։ Այդ ծրագիրը, իհարկե, ավանդապես ընդգրկում է տարբեր բաժիններ, տարբեր ուղղություններ՝ պետականաշինություն, արտաքին քաղաքականություն, տնտեսական զարգացում, սոցիալական ոլորտ, էկոլոգիա, բայց ունենք նաև մեր առանձին տեսլականը և տարբերվող մոտեցումներն այլ քաղաքական ուժերից։
Ինչ վերաբերում է պետականաշինության գործընթացին՝ մեր քաղաքական ուժը՝ Արցախի պահպանողական կուսակցությունը և ես կարծում ենք, որ ժողովրդավարական պետական համակարգին և սոցիալական ուժեղ պետությանն այլընտրանք չկա Արցախում։ Մենք պետք է մեր երկիրը զարգացնենք այս ուղղությամբ՝ որպես վերջնանպատակ և գերնպատակ մեզ համար միասնական հայրենիք և հայկական պետություն կերտելն է։ Այս ուղղությամբ պետք է տարվի հետևողական աշխատանք։ Ճիշտ է, մենք պետք է իրատես լինենք՝ պրովոկացիաներով ու դեմագոգիայով չզբաղվենք և չարագացնենք գործընթացները։ Հետևաբար, մինչև Մայր Հայաստանի հետ Արցախի վերամիավորումը մենք պետք է մի ժամանակահատված թևակոխենք, նոր այդ վերամիավորումը կայանա։
Բոլորս պարտավոր ենք զարգացնել Արցախը։ Այնպես է ստացվել, որ մենք ունենք մեկ ընդհանուր հայրենիք, բայց երկու տարբեր պետականություն։ Սա մեր որոշումը չէր։ Սա պարտադրված էր՝ հաշվի առնելով աշխարհաքաղաքական զարգացումները, միջազգային իրավունքը և այլն։ Ուժեղացնելով Արցախյան Հայաստանը (դա այն տերմինաբանությունն է, որը շրջանառության մեջ է դրել Արցախի պահպանողական կուսակցությունը), մենք ուժեղացնում ենք Մայր Հայաստանը, մենք ուժեղացնում ենք մեր ընդհանուր հայրենիքը»։
Մանրամասները՝ տեսանյութում։