«Որևէ երկրի քաղաքական դաշտում երկխօսութիւնը՝ իբրև քաղաքական մշակոյթ, օրինաչափ երևոյթ է։ Մեր երկրում երկխօսութիւնը ներկայ տեսքով նորարարութիւն է՝ իբրև քաղաքական աշխատանքի եղանակ»,- «Առաջին լրատվականի» հետ զրույցում այսպես գնահատեց ՀԱԿ-իշխանություն երկխոսությունը Լիբանանի «Ազդակ» օրաթերթի գլխավոր խմբագիր Շահան Գանդահարյանը։ Նա նաև հավելեց.
«Երկխօսութիւնը անհրաժեշտ է, որ լինի բազմակողմանի և մնայուն։ Այլ խօսքով՝ դա առաջադրելի աշխատելաձև է ոչ միայն իշխանութիւնների և այս դէպքում ընդդիմադիր մի ուժի հետ, այլև քաղաքական դաշտը բաղկացնող բոլոր ուժերի միջև։
Միշտ չէ, որ երկխօսութիւնը կը հանգի համաձայնութեան կամ քաղաքական համագործակցութեան։ Այնուամենայնիւ, երկխօսութիւնը՝ իբրև աշխատանքաոճ, անհրաժեշտ է, որ լինի բաց և մնայուն։ Քաղաքական այս տեսութիւնը կապ չունի քաղաքական կամ ընտրական գործարքների հետ»։
Շ. Գանդահարյանի խոսքով, երկխոսության արդյունքների մասին կանխատեսումներ անելը դեռ վաղ է. «Իշխանութիւն-ՀԱԿ երկխօսութեան արդիւնքների մասին կանխատեսումներ անելը այժմ վաղ է։ Կարծում եմ, թէ ժամանակը ցոյց կու տայ, թէ այս երևոյթը որքանո՞վ է առնչւում մնայուն ոճ որդեգրելու առաջադրանքի հետ, և որքանո՞վ այն պարագայական բնոյթ է ունենալու»,- նշեց «Ազդակ»-ի գլխավոր խմբագիրը։
