Այս օրերին գերմանական «Ֆրիդրիխ Էբերտ» հիմնադրամի հրավերով Հայաստանում է գտնվում Գերմանիայի Բունդեսթագի պատգամավոր, սոցիալ-դեմոկրատական կուսակցությունը ներկայացնող Դիրք Վիզեն, որը հանդիպում ունեցավ Գերմանիայի քաղաքականությամբ հետաքրքրվող երիտասարդների հետ։
«Առաջին լրատվական»-ը մի քանի հարց ուղղեց Դիրք Վիզեին։
-Ինչպե՞ս է ընթանում Հայաստանի եվրաինտեգրման պրոցեսը, ըստ Ձեզ, թավշյա հեղափոխությունից հետո։
-Իմ կարծիքով՝ Հայաստանը ճիշտ ուղու վրա է։ Նիկոլ Փաշինյանի կառավարությունը նախաձեռնել է շատ բարեփոխումներ։ Մեծ սպասելիքներ կան ժողովրդի կողմից։ Մենք աջակցում ենք Նիկոլ Փաշինյանի կառավարությանը՝ իրենց բարեփոխումների ծրագրերում։ Գերմանական տեսանկյունից կարող եմ ասել, որ հայ-գերմանական հարաբերությունները ջերմ են։ Մենք մտադրված ենք այդ հարաբերություններն ամրապնդել առաջիկա տարիներին ևս։
–Ապրիլի 5-ին Հայաստանում տեղի է ունենալու հանրաքվե, որի նպատակն է հանգուցալուծել Սահմանադրական դատարանում ստեղծված ճգնաժամը։ Ըստ Ձեզ՝ ինչպե՞ս պետք է լուծել դատաիրավական համակարգում ծագած խնդիրները, պե՞տք է միանշանակ հեռացնել նախկին դատավորներին։ Ի՞նչ է հուշում գերմանական փորձը։
-Մենք աջակցում ենք Նիկոլ Փաշինյանի կառավարությանը՝ իրենց ձեռնարկած բարեփոխումների ծրագրերում։ Մենք նշում ենք, որ կարևոր է ներգրավել Վենետիկի հանձնաժողովին գործընթացներում։ Եվ մենք կարծում ենք, որ դա կարևոր հանգամանք է, որպեսզի աջակցենք Նիկոլ Փաշինյանի կառավարությանը։
–Իր կառավարման շրջանում ՀՀ վարչապետ Նիկոլ Փաշինյանը երկու այց է կատարել Գերմանիա, մեկ անգամ էլ Գերմանիայի կանցլեր Անգելա Մերկելն է այցելել Հայաստան։ Որքանո՞վ են այդ հանդիպումները նպաստել առևտրատնտեսական հարաբերությունների զարգացմանը։
-Կարծում եմ, որ երկու երկրների միջև առկա առևտրատնտեսական հարաբերությունները լավ ճանապարհին են։ Բայց միշտ կա հնարավորություն՝ անելու ավելին։ Շատ լավ նշան է, որ գերմանական մեծ ձեռնարկություն «Siemens»-ը գալիս է Հայաստան։
-Հայաստանը ԵԱՏՄ անդամ է, դա չի՞ խոչընդոտում, որ թավշյա հեղափոխությունից հետո ԵՄ-ի հետ հարաբերություններն ինտենսիվ զարգանան։
-Իմ կարծիքով՝ Հայաստանը շատ լավ օրինակ է, թե ինչպես պետք է չլինել ՌԴ-ի կամ ԵՄ-ի հետ։ Մենք Հայաստանի հետ կնքել ենք «Համապարփակ և ընդլայնված գործընկերության» համաձայնագիրը, Հայաստանը միաժամանակ ԵԱՏՄ անդամ է։ Եվ ես կարծում եմ, որ սա շատ լավ ճանապարհ է Հայաստանի համար։