Միացյալ Նահանգների նախագահ Դոնալդ Թրամփի նախընտրական շտաբը դատի է տվել Washington Post թերթին որոշ հոդվածների համար, որոնցում խոսվում է Թրամփի՝ Ռուսաստանի հետ դավադիր համաձայնություն ունենալու մասին։ Այս մասին գրում է Fox News-ը։
Պարբերականի տվյալներով, նախագահի թիմը «միլիոնավոր դոլարներ» է պահանջում Թրամփի՝ Ռուսաստանի հետ ենթադրյալ դավադիր համաձայնության վերաբերյալ ԶԼՄ-ներում հրապարակված «կեղծ և զրպարտչական հայտարարությունների» համար։
Բողոքները ներկայացվել են Վաշինգտոնի շրջանային դատարան։ Հայցում Washington Post-ի մի քանի հոդվածներ են նշվում, հրապարակված 2019 թվականին, որոնցում Թրամփի թիմին արտասահմանյան միջամտության հետ կապող հայտարարություններ կան։
«Հայտարարությունները եղել են և մնում են 100 % կեղծ և զրպարտչական», – հայտարարել է Թրամփի իրավաբանական ավագ խորհրդատու Ջենի Էլիսը։
Նա պնդում է, որ հրապարակման ժամանակ թերթն իմացել է հայտարարությունների կեղծ լինելու մասին, սակայն դիտավորյալ հրապարակել է դրանք, նպատակ ունենալով վնաս հասցնել Թրամփի թիմին՝ մոլորության մեջ գցելով սեփական ընթերցողներին։