Իսրայելի վարչապետ Բենիամին Նեթանյահուն հայտարարել է Իսրայելում անցկացված ընդհանուր ընտրություններում իր հաղթանակի մասին: Ըստ ընտրատեղամասերից դուրս եկողների շրջանում հարցումների՝ նրա կուսակցությունը այնքան էլ առաջ չէ իր հիմնական մրցակից Բենի Գանցից՝ գրում է bbc-ն:
Առաջին հարցման արդյունքների հրապարակումից կարճ ժամանակ անց Նեթանյահուն Twitter-ում տեղադրել է լուսանկար, որում նա նստած է իր կողմնակիցների հետ սեղանի շուրջ: Նկարը ուղեկցվում է վերնագրով. «Հսկայական հաղթանակ Իսրայելի համար»:
Ավելի ուշ նա հայտարարել է, որ պայմանավորվել է աջակողմյան և կրոնական կուսակցությունների առաջնորդների հետ հանդիպել մարտի 3-ին՝ կայուն և ուժեղ կառավարություն ձևավորելու համար:
«Սա մեծ հաղթանակ է «Լիկուդի» ղեկավարած աջակողմյան ճամբարի համար: Մենք անցանք մի քանի բարդ ընտրապայքարների միջով, և ժամանակն է ավարտին հասցնելու ընտրությունների շարանը և ձևավորելու կառավարություն: Մեր հակառակորդներն ասում էին, որ Նեթանյահուի դարաշրջանն ավարտված է, բայց մենք հավաքեցինք բոլոր ուժերը և շրջեցինք իրավիճակը: Կիտրոնները վերածեցինք լիմոնադի»,- ասել է Նեթանյահուն՝ ելույթ ունենալով իր կողմնակիցների առջև Թել Ավիվում կուսակցության նախընտրական շտաբում: