«Առաջին լրատվական»-ի զրուցակիցն է ԱԺ «Իմ քայլը» խմբակցության քարտուղար, «Այո»-ի քարոզչական շտաբի պատասխանատու Հակոբ Սիմիդյանը:
– Ի՞նչ փուլում են աշխատանքները, նախապես ասեմ՝ ակտիվություն չի նկատվում:
– Հանրային ակտիվությունը, այո, պակասում է, բայց մենք մեր մարզային բոլոր շտաբները ձևավորել ենք, վերջին դետալներն ենք ավարտում, 2-3 օրվա ընթացքում կսկսենք մեր ակտիվ քարոզչությունը:
– Հետևո՞ւմ եք, պայմանական ասած, ձեր հակառակորդ թիմի քայլերին:
– Իմ զբաղվածությունը մեծ է, ես հիմնականում իմ աշխատանքով եմ զբաղված և իհարկե, հետևում եմ քաղաքական անցուդարձին, անհրաժեշտության դեպքում նաև արձագանքում եմ:
– Կարծիք կա, որ անհրաժեշտ է այստեղ ավելի զգոն հետևել:
– Ըստ իրավիճակի, չգիտեմ՝ ինչ նկատի ունեք:
– Նկատի ունեմ այն տեղեկատվությունը, ըստ որի՝ «Ոչ»-ի ճամբարից պատրաստվում են գումարներ բաժանել:
– Մեզ էլ են այդ լուրերը հասել: Մենք նման տեղեկատվությունները փոխանցում ենք իրավապահ համակարգին:
– Նախ ճշտում եք, չէ՞, հնարավոր է էլի հերթական սուտ տեղեկատվություն լինի:
– Այո, իհարկե, մենք նույնպես փորձում ենք դրանց հավաստիությունը հասկանալ, անհրաժեշտության դեպքում փոխանցում ենք իրավապահ մարմիններին: Բայց քաղաքացիները թող շատ չանհանգստանան այդ լուրերից, քանի որ այն կառույցները, որոնք այդտեղ անելիք ունեն, աչալուրջ են և կհետևեն, որ որևէ մեկը ապօրինություն չիրականացնի: Վստահ եմ, որ իրավապահներն ունեն ապօրինի դեպքերը կանխելու ներուժ, մենք էլ ուշադիր ենք:
– Կորոնավիրուսը կապ ունի՞, որ այսպիսին է ակտիվությունը:
– Մեծ հաշվով՝ ոչ, նախապատրաստական աշխատանքներ են իրականացվում, պատգամավորները զբաղված են Ազգային Ժողովի գործերով, այս գործընթացները կավարտվեն, կսկսենք քարոզարշավը:
– Այսինքն՝ հնարավոր չէ ստեղծվի այնպիսի իրավիճակ, երբ ստիպված այս գործընթացները կանգնեցնելու հարկ լինի:
– Հիմա կառավարությունը, իշխանությունները, եթե կորոնավիրուսի կոնտեքստում դիտարկենք, ամեն ինչ անում են, որ վերահսկելի լինի իրավիճակը, և ես այս պահին որևէ անհանգստություն չունեմ, որ դրա հետ կապված որևէ խնդրի առաջ կկանգնենք, իհարկե, եթե զարգացումները բացասական ընթանան, ըստ այդ իրավիճակի կառաջնորդվեք:
– Հանձնաժողովներում «Այո»-ի և «Ոչ»-ի ինչ համամասնությամբ են տեղերը բաժանվել:
– Հանձնաժողովի անդամների թիվը յոթը պետք է լինի՝ երկու թեկնածու ներկայացնելու է «Այո»-ն, երկուսը՝ «Ոչ»-ը, և երեքը՝ ԿԸՀ-ն:
– Կա ահազանգ, որ «Այո»-ի հանձնաժողովներում տեղերը զբաղեցրել են նախկինում փորձ ունեցած անձինք, մի փոքր էլ շեշտադրվում է, որ նախկին ՀՀԿ-ական, ՀՅԴ-ական անդամներ են ներգրավված ձեր հանձնաժողովներում:
– Մենք այսօր էլ ենք վերանայել մեր ցուցակները, մենք ենք ներկայացրել մեր ներկայացուցիչներին, այդ մասով խնդիր չկա:
– Այսինքն՝ նախկիններից նրանք, ովքեր հայտնվել են հանձնաժողովներում Կենտրոնական ընտրական հանձնաժողովի՞ որոշմամբ են հայտնվել:
– Այո, խառնաշփոթը հենց դրա հետ է կապված, մարդիկ կարծում են, թե նրանց մենք ենք ներկայացրել: Մենք ստուգում ենք «Իմ քայլ»-ի՝ «Այո»-ի շտաբի մեր ցուցակները՝ տեսնելու խնդիր ունենք, թե ոչ:
– Խորհրդարանական ուժերը, նաև խորհրդարանից դուրս ձեզ ընդդիմադիր ուժերը որոշեցին մենակ թողնել ՔՊ-ին:
– Ենթադրում էի, թե խորհրդարանական ուժերը ինչ դիրքորոշում կունենային. ԲՀԿ-ն ի սկզբանե չեզոքություն էր պահում, «Լուսավոր Հայաստանը» սկզբից այլ իներցիայով էր շարժվում, հետո կանգառ վերցրեց և հիմա պասիվ դիրքերում է…
– Այս պայմաններում հաղթահարելի՞ է հանրաքվեի համար նվազագույն շեմը՝ 650 հազար քվե:
– Համոզված եմ՝ այո: Այն մարդիկ, ովքեր մեզ քվեարկել են, կքվեարկեն նաև «Այո»-ին կողմ, իսկ ովքեր չեն քվեարկել մեզ, քարոզարշավի արդյունքում կգնան ընտրատեղամասեր և իրենց որոշումը կփաստեն: Ուզում եմ ասել, որ քարոզչությունն էլ այս առումով ահագին բան է փոխելու:
– Շատերը կարծում են, որ այս խնդիրը հանրաքվեի տրամաչափի չէր, այնուամենայնիվ:
– Երբ որոշակի ճգնաժամ կա, և սահմանադրական մարմինները խնդրի օրենքով սահմանված լուծումը չունեն, պետք է սահամանադիրը՝ ժողովուրդն ինքը որոշի՝ ինչպես պետք է հանգուցալուծվի այս հարցը: Իսկ ՍԴ հարցն արդեն ճգնաժամային էր, և մենք դիմեցինք ժողովրդին: Մենք խոսել ենք հանրաքվեի ինստիտուտի կայացման մասին, և խորհրդարանական ընտրություններից մեկ տարի հետո կարիք ունենք ժողովրդի կարծիքը հարցնելու:
– Դուք ասում եք, որ հանրաքվեն վերջին գործիքն է, մի պահ պատկերացնենք, որ անհրաժեշտ ձայներ չեն հավաքվում, փակուղի՞ է մտնում խնդիրը:
– Վստահություն ունի իշխանությունը, և հիմա չեմ տեսնում առիթ նման սցենար ունենալու, բայց եթե նման իրավիճակ լինի, ըստ այդմ որոշում կկայացնենք: Մենք համոզված ենք՝ հանրությունը ճշգրիտ կարձագանքի… Հանրությունը ընտրությունից ընտրություն տեսել է ՍԴ բացասական դերակատարությունը: Դժգոհությունը ընդհանրապես դատական համակարգից է…
– Առջևում հանրաքվեի քարոզչական շրջանն է, ձեր քարոզչության ջերմաստիճանը կախվա՞ծ է «Ոչ»-ի ճամբարի գործողություններից:
– Ո՛չ, բացարձակ: Որևէ հանգամանքի հետ կապված չէ, կարևորը հավատամքն է, ճշմարտությունն է, ինչի համար առաջ ենք գնում և ինչի համար դիմում ենք հանրությանը: Այս գործը պետք է անենք, և համոզված եմ՝ ապրիլի 5-ին արդյունքները դրական կլինեն:
– Անգամ եթե ձեր ընդդիմախոսները որոշեն գոտկատեղից ներքև հարվա՞ծ հասցնել. քարոզչության ընթացքում անում են այդպիսի բաներ, հետո ներում են իրար:
– Իհարկե, թույլ չենք տա մեզ գոտկատեղից ներքև խփել, մեր զինանոցը բավականին հարուստ է, մենք շատ ասելիք ունենք նաև մեր ընդդիմախոսներին:
Հարցազրույցն ամբողջությամբ՝ տեսանյութում:
