Աշխարհում ամենահաջողակ քաղաքական գործիչները խոշոր գործարարներն են, այսօր խորհրդարանում լրագրողների հետ հանդիպմանը հայտարարել է ԲՀԿ նախագահ Գագիկ Ծառուկյանը, բերելով ԱՄՆ նախագահ Թրամփի և Իտալիայի նախկին վարչապետ Բեռլուսկոնիի օրինակը: ԱՄՆ նախագահ Դոնալդ Թրամփը նախագահում է մի երկրում, որտեղ քաղաքականությունը գտնվում է ուժեղ ինստիտուտների ազդեցության ներքո, ինչը ցույց տվեց նաև հենց խոշոր գործարարությունից խոշոր քաղաքականություն Թրամփի մուտքը: Դրա վերաբերյալ կային լուրջ մտահոգություններ, սակայն նաև կարծիքներ, որ ուժեղ ինստիտուտները այդուհանդերձ Թրամփին պահելու են ամերիկյան քաղաքականության ավանդական հստակ ուղեծրում, թույլ չտալով խորքային շեղումներ: Ինչ վերաբերում է Բեռլուսկոնիին, ապա այստեղ պատկերն այլ է: Իտալիայում նրա կառավարման շրջանում ուժեղ է եղել ոչ թե ժողովրդավարական, այլ կոռուպցիոն ինստիտուցիոնալությունը, ինչի վկայությունն են Բեռլուսկոնիի առնչությամբ կոռուպցիոն բազմաթիվ պատմություններն ու դրանց առնչությամբ քրեական գործերն ու դատավճիռները:
Այդպիսով, Գագիկ Ծառուկյանի մեղմ ասած վիճահարույց հայտարարության անհամարժեք օրինակները ևս մեկ անգամ ընդգծում են Հայաստանում բիզնեսի և քաղաքականության տարանջատման խնդրի սկզբունքայնությունը: Հայաստանի խորհրդարանում երկրորդ ուժի առաջնորդը տալիս է քաղաքականության վերաբերյալ գնահատականներ, որոնք ոչ միայն համարժեք չեն իրողություններին, այլ ուղղակի վկայում են այն մասին, որ ներկայիս քաղաքական հարաբերակցությունը շարունակում է լինել Հայաստանի արդիականացման հեռանկարի հարցում անհամարժեք և պահանջում է խորքային վերափոխում: Իսկ խնդիրը Հայաստանում առավել քան սուր է, հաշվի առնելով այն, որ Հայաստանում ընդհանրապես գրեթե զրոյական մակարդակի է ժողովրդավարական-քաղաքական ինստիտուցիոնալացումն ու քաղաքական արդիական մշակույթը, որը թույլ կտա զսպել քաղաքականության մեջ բիզնեսի անմիջական հավակնությունների արատավոր էֆեկտը: Ի վերջո բոլորի համար է հասկանալի, որ բիզնեսն ու քաղաքականությունը կապված են փոխադարձ շահերով, բայց հենց այդ ամենը կառավարելու միջոցն էլ ուժեղ հասաակական-քաղաքական ինստիտուտներն են, որոնց բացակայության դեպքում առաջանում են հասարակական-պետական լրջագույն խնդիրներ:
Լուսանկարը՝ Armeniasputnik-ի
