Վանաձորի պետական համալսարանի հոգաբարձուների խորհրդի մարտի 1-ին տեղի ունեցած նիստում Վանաձորի պետական համալսարանի ռեկտոր ընտրվեց Ռուստամ Սահակյանը՝ հավաքելով հենց առաջին փուլում 15 ձայն, երկրորդ տեղում էր համալսարանի կենսաբանության ֆակուլտետի դեկան Զարուհի Վարդանյանը՝ վեց ձայնով։ Ընդհանուր առմամբ ռեկտորի պաշտոնի համար առաջադրվել էր 4 թեկնածու։
ԿԳՄՍ նախարար Արայիկ Հարությունյանը երեկ անդրադառնալով այս ընտրությանը՝ նշել է, որ «դրսից ռեկտոր է եկել»։ «Երկար տարիներ Հայաստանի սահմաններից դուրս իր գործունեությունը ծավալած Ռուստամ Սահակյանը, ով անընդհատ փորձ է արել վերադառնալ հայրենի Վանաձոր և դրսում կուտակած իր փորձը ծառայեցնել հայրենիքին, երեկ ընտրվել է Վանաձորի պետական համալսարանի ռեկտոր: Շնորհավորում եմ Ռուստամ Սահակյանին ու վստահություն հայտնում, որ օգտագործելով իր կապերն ու հնարավորությունները՝ նոր ռեկտորը Վանաձորի պետական համալսարանը կդարձնի տարածաշրջանային զարգացող և հեռանկարային բուհ»:
Ինքը՝ Ռուստամ Սահակյանը, երեկ իր ընտրվելուց հետո ասաց, որ հուզմունքը շատ է, քանի որ այս ընտրությունը նշանակում է իր հայրենիք վերադարձ: «Ես չէի սպասում։ Վիճակը բարդ է, բայց կարող եմ ասել, որ ես իմ բոլոր ռեսուրսները կներդնեմ, որպեսզի Վանաձորի պետական համալսարանը մեր բոլորի համատեղ ուժերով վերափոխվի, գեղեցկանա և դառնա բոլորիս հպարտությունը»,- ասաց Սահակյանը։
Վանաձորի փոխքաղաքապետ Արման Բեռնեցյանը, ով նաև դասավանդում է Վանաձորի պետական համալսարանում, «Առաջին լրատվական»-ի հետ զրույցում ասաց, որ Ռուստամ Սահակյանի ընտրությունը ողջունելի է, որ դրանով մենք ունեցանք հայրենադարձության մեկ օրինակ:
«Ռեկտորի այս ընտրությունը, իհարկե, առիթ եղավ, որ նա վերադառնա հայրենիք։ Բնականաբար, սա նորմալ եմ գնահատում։ Մեզ համար էլ է ուրախալի, որ մարդը էներգիա ունի և պատրաստ է այդ ամբողջ էներգիան, ռեսուրսները ներդնել, որպեսզի բուհը դրանից առավելագույնս օգուտ ստանա։ Իսկ բուհն ունի իր առջև անելիքներ, ռազմավարություն, և վստահ եմ, որ այս ռեկտորը, որը ընտրվեց հոգաբարձուների խորհրդի մեծամասնության ձայներով, կարդարացնի բոլորի հույսերը»,- ասաց Բեռնեցյանը՝ հավելելով, որ նոր ռեկտորը դասավանդման փորձ ունի նաև Հայաստանում, դասավանդել է Վանաձորի ճարտարագիտական համալսարանում։
Ինչ վերաբերում է բուհի խնդիրներին, ապա Բեռնեցյանը նշեց, որ ամենամեծ խնդիրը այսօր ավելի զարգանալը, ավելի աճելն ու մրցունակ դառնալն է: «Վանաձորի պետական համալսարանն ունի այն ներուժը, որ դառնա հանրապետության առաջատար բուհերից մեկը, և մենք բոլորս պետք է ձգտենք դրան։ Իսկ բուհն ավելի մրցունակ կարող ենք դարձնել դասավանդման որակը բարձրացնելով, որպեսզի դիմորդը ընտրի՝ ինչի համար սովորել Վանաձորի պետական համալսարանում և ոչ թե մեկ այլ բուհում։ Եվ մենք պետք է փորձենք այդ սպասելիքները հնարավորինս արդարացնել»,- ասաց փոխքաղաքապետը։
Հիշեցնենք, որ նախկին ռեկտոր Գուրգեն Խաչատրյանն ազատվել էր աշխատանքից սեփական դիմումի համաձայն:
Ռեկտորի պաշտոնակատար էր նշանակվել ուսումնական աշխատանքների գծով պրոռեկտոր Սուսաննա Թումանյանը:
