«Առաջարկությունը ես ստացել եմ հենց «Նոր Արցախ» դաշինքի ղեկավարներից և նաև պարոն Մայիլյանից՝ որպես նախագահի թեկնածու: Եվ ես որոշեցի իմ մասնագիտական ունակությունները օգտագործել, որպեսզի «Նոր Արցախ» թիմը նախագահի թեկնածու պարոն Մայիլյանի համար լինի հենարան՝ իրականություն դարձնելու վաղվա Արցախի իր տեսլականը»,- «Առաջին լրատվական»-ի հետ զրույցում ասաց «Նոր Արցախ» դաշինքի կողմից պատգամավորի թեկնածու առաջադրված Գրիգորի Սահակյանը:
Մեր զրուցակիցը, երկար տարիներ ծառայած լինելով Պաշտպանության բանակի շարքերում, կարծում է, որ իր գիտելիքները շատ օգտակար կարող են լինել արդեն իսկ խորհրդարանում պաշտպանության ոլորտի հարցերի շուրջը քննարկումների ժամանակ: «Արցախի Հանրապետության անվտանգության և պաշտպանության հարցերը նաև Հայաստանի Հանրապետության անվտանգության և պաշտպանության հարցերի շրջանակում են կատարվում: Դրանք միակողմանի չի կարելի դիտարկել, դրա համար անհրաժեշտ եմ համարում դիտարկել ավելի գլոբալ մասշտաբներով»,- նկատեց Գրիգորի Սահակյանը:
Նրա կարծիքով՝ 2016 թվականի ապրիլյան պատերազմը բոլորիս համար դաս է եղել, և այս 4 տարիների ընթացքում բավականին աշխատանք է կատարվել թերությունները վերացնելու ուղղությամբ. «Եվ ասել, որ հիմա հակառակորդը կարող է հանկարծակի առաջ շարժվել ու դիմել սադրանքների՝ հնարավոր չէ, ինչը այն վերլուծության արդյունքն է, որ կատարվել է 2016-ից հետո: Բայց անելիքներ շատ ունենք, և գործընթացները պետք է շարունակական լինեն»:
Հարցազրույցն ամբողջությամբ՝ տեսանյութում:
