Ռուս-թուրքական ընթացիկ հակամարտության ֆոնին բավականին հատկանշական է Հայաստանի՝ Տավուշի սահմանային գոտու ուղղությամբ ադրբեջանական զինուժի ակտիվացումը: Նախօրեին կրակահերթ է արձակվել Ոսկեպար գյուղի ուղղությամբ, անցնող օրերին գնդակոծվել էր Կոթին: Հայկական կողմի պատասխանից զոհվել էր ադրբեջանցի մի զինծառայող, և չի բացառվում, որ ադրբեջանցիները ամեն կերպ փորձում են, այսպես ասած, պատասխան կորուստ պատճառել հայկական կողմին:
Իրավիճակը անշուշտ աննախադեպ չէ, սակայն ռուս-թուրքական հակամարտության ֆոնը այն դարձնում է որոշակիորեն առանձնահատուկ՝ հաշվի առնելով նաև կանխատեսումները կամ դիտարկումները, որ Թուրքիան կարող է փորձել Ադրբեջանի միջոցով ճնշում գործադրել Ռուսաստանի վրա՝ Կովկասում կայունության հարցում: Իսկ դա բնականաբար նշանակելու է ճնշում արցախյան ուղղությամբ:
Միևնույն ժամանակ, սակայն, պետք չէ հաշվից դուրս թողնել նաև այն, որ ռուս-թուրքական հակամարտության պայմաններում ոչ միայն Ալիևին կփորձեն օգտագործել՝ հատկապես հաշվի առնելով նրա բարդ վիճակը, այլև Ալիևն ինքը կարող է փորձել օգտագործել իրավիճակը թե՛ Մոսկվայի, թե՛ Անկարայի, հնարավոր է նաև Արևմուտքի հետ առևտրի համար:
Բանն այն է, որ Իդլիբում ռուս-թուրքական բախումը Կովկաս տեղափոխելու հեռանկարը անցանկալի է նաև Արևմուտքի համար: Այստեղ որոշակի կայծեր գցելով՝ Ադրբեջանի նախագահը կարող է փորձել օգտագործել իրավիճակը իր, այսպես ասած, պահանջներն առաջ քաշելու համար: Խոսքն իհարկե բավականին զուսպ և չափավոր առաջքաշման մասին է: Այստեղ հայկական կողմը պետք է պատրաստ լինի ամենաուժգին սադրանքներին անգամ, թեև դրանց հավանականությունը բավականին քիչ է, որովհետև Ալիևն անշուշտ պատկերացնում է դրա ռիսկը թե՛ հայկական ուժերի պատասխանի, թե՛ միջազգային արձագանքի առումով:
Ավելին, այստեղ այդ տեսանկյունից նրա համար առկա է բավականին հետաքրքիր նշան՝ Վրաստանի նախկին վարչապետ, պաշտպանության նախարար Իրակլի Ղարիբաշվիլիի այցը Հայաստան, որի ընթացքում հայտարարվեց նաև 2020 թվականին Վրաստանում ՆԱՏՕ-ի զորավարժությանը Հայաստանի մասնակցության մասին: Դա նշանակում է բավականին կոնկրետ ռազմաքաղաքական պայմանավորվածություն, ընդ որում՝ ոչ միայն հայ-վրացական, այլև Հայաստան-Վրաստան-ՆԱՏՕ ձևաչափում: Չի բացառվում, որ Ալիևը նաև այդ առումով է զգում խաղից դուրս մնալու որոշակի միտում և փորձում Հայաստանի հյուսիսարևելյան սահմանին հիշեցնել իր մասին:
Բանն այն է, որ հյուսիսարևելյան սահմանն այս դեպքում իրապես հատկանշական ուղղություն է, քանի որ դա գործնականում նաև հայ-վրացական խաչմերուկ է, որտեղ Բաքուն փաստորեն փորձում է «անցնել կարմիր լույսի տակով»:
Լուսանկարը՝ Armeniasputnik-ի