Իսրայելում մարտի 2-ին տեղական ժամանակով 07:00-ին (Երևանի ժամանակով 09:00-ին) բացվել են ընտրատեղամասերը երկրորդ կրկնական և վերջին 11 ամսվա ընթացքում արդեն երրորդ խորհրդարանական ընտրություններում: Դրանց արդյունքներով կորոշվի 23-րդ գումարման Կնեսետի կազմը, ինչպես նաև պետք է կազմավորվի կառավարական կոալիցիա և նշանակվի վարչապետ։ Երկրորդ կրկնական խորհրդարանական ընտրություններն անցկացվոււմ են այն պատճառով, որ նախորդ կրկնական ընտրությունների արդյունքներով, որոնք կայացել են սեպտեմբերի 17-ին, վարչապետի պաշտոնակատար և «Լիկուդ» կուսակցության արաջնորդ Բենիամին Նաթանյահուն, իսկ հետո նաև նրա հիմնական ընդդիմախոս, «Կահոլ-Լավան» կուսակցությունների կենտրոնամետ դաշինքի ղեկավար Բենի Գանցը չկարողացան կառավարություն կազմել նրանցից յուրաքանչյուրին հատկացված 28 օրվա ընթացքում: 2019 թվականի ապրիլի 9-ի ընտրություններից հետո Նաթանյահուն նույնպես չէր կարողացել օրենքով իրեն հատկացված 42-օրյա ժամկետում համաձայնության հասնել կոալիցիայի ձևավորման շուրջ, որը Կնեսետում նվազագույն անհրաժեշտ 61 տեղ կունենար 120-ից: Հաղթելու հիմնական հավակնորդները, ինչպես և նախորդ երկու անգամ, երկուսն են՝ «Լիկուդը» և «Կահոլ-Լավանը», բայց գլխավոր ինտրիգն այն է, թե կկարողանա արդյոք հաղթողը կայուն կառավարություն կազմել: Ժամանակակից Իսրայելի ողջ պատմության ընթացքում ընտրություններին մասնակցած կուսակցություններից ոչ մեկին չի հաջողվել 61 մանդատ ստանալ 120 տեղանոց խորհրդարանում, ուստի արդյունքների հայտարարումից հետո ստեղծվում են կառավարական կոալիցիաներ: Էկզիթպոլերի արդյունքները կհրապարակվեն Երևանի ժամանակով 24:00-ին ընտրական տեղամասերի փակումից անմիջապես հետո, իսկ ձայների հաշվման առաջին պաշտոնական տվյալներն սպասվում են դրանից մի քանի ժամ անց, հաղորդել Է ՏԱՍՍ-ը: