Ամերիկյան Կալիֆոռնիա նահանգում երկու գիտնականներ մոլորվել են անտառում և մեկ շաբաթ ջուր են խմել ջրափոսից: Նրանց փրկության համար կազմակերպվել է մասշտաբային որոնողական գործողություն: Այս մասին հաղորդում է NBC News հեռուստաալիքի կայքը:
77-ամյա լեզվաբան Քերոլ Կիպարսկին (Carol Kiparsky) և Պարկինսոնի հիվանդության 72-ամյա հետազոտող-գիտնական Յան Իրվին (Ian Irwin)` Պալո-Ալտո քաղաքից, Սուրբ Վալենտինի օրը ուղևորվել են արշավի Թոմալս ծովածոցի մերձակայքում:
Փետրվարի 15-ին նրանք պետք է ազատեին արձակուրդներին ժամանակավորապես վարձակալած տնակը, սակայն այդպես չեն վարվել: Քոթեջի տերերը հայտնաբերել են վարձակալների բոլոր իրերը, այդ թվում` բջջային հեռախոսները, դրամապանակները և ավտոմեքենան: Կիպարսկին և Իրվինը բաց են թողել փետրվարի 16-ին նախատեսված հանդիպումը և չեն ներկայացել ծրագրված ընտանեկան միջոցառմանը:
Անհետացածների որդու` Ջոն Իրվինի (John Irwin) խոսքով` ընտանիքը ենթադրել է, որ զույգի հետ ինչ-որ ահավոր բան է պատահել: Նա պատմել է, որ իր ծնողները մոլի ճանապարհորդներ են, և որ նրանք շատ լավ գիտեին այդ տեղանքի կածանները: Անհետացածներին որոնելու համար կազմակերպվել է մասշտաբային փրկարարական գործողություն հարյուրավոր կամավորների մասնակցությամբ:
Շաբաթ օրը` փետրվարի 22-ին, որոնողները լսել են օգնության կանչեր: Փրկարարները կորածներին հայտնաբերել են այնքան խիտ մացառուտներում, որ նրանք ստիպված էին սողալ փորի վրա` հասնելու համար Իրվինին և Կիպարսկուն: Պարզվել է, որ զույգը մոլորվել է, երբ մթնել է: Նրանք իրենց հետ չեն ունեցել ոչ ուտելիք, ոչ ջուր, բացի դրանից` նրանք եղել են թեթև հագնված: Մոլորվելով` գիտնականները գտել են ջրափոս և ջուր են խմել այնտեղից այնքան ժամանակ մինչև նրանց գտել են:
Տուժածներին մացառուտներից տարհանելու համար գործի է դրվել ուղղաթիռ: Կիպարսկին և Իրվինը եղել են գիտակից վիճակում, սակայն եղել են ջրազրկված: Նրանց հոսպիտալացրել են:
